Байрамың менән, "БелЗАН"!

Бөгөн Башҡортостан Башлығы Радий Хәбиров социаль селтәрҙәрҙә республикалағы ҡеүәтле предприятиеның юбилейы уңайынан уның хеҙмәткәрҙәрен ҡотланы.

“Беҙҙең “БелЗАН”да етештерелгән нығытмаларҙың 40 килограмы еңел автомобилдә, ә йөк машинаһында – 200 килограмм. Бер генә Рәсәй етештереүсеһе лә бындай ҡеүәт менән маҡтана алмай. Дөрөҫөн әйткәндә, “БелЗАН” ошо йүнәлештә импортҡа алмаш була алған берҙән-бер ватан предприятиеһы.

Был проект – беҙҙең өҫтөнлөклө инвестиция проекттарының береһе. Уның пландары ҙур. План буйынса, өс йылда етештереүгә 1,2 миллиард һум самаһы инвестиция күҙаллап була. Ә был - яңы станоктар, ҡорамалдар. 2030 йылға тиклем “БелЗАН”дың етештереү күләме ике тапҡырға артасаҡ тигән иҫәпләүҙәр тормошҡа ашырҙай, предприятиеның автомобиль нығытмалары баҙарында әлеге 36 проценттан 51 процентҡа тиклем етәсәк, бурыстары кәмейәсәк, ә һатыуҙан рентабеллек 10 проценттан ашасаҡ тигәне лә - аныҡ һандар.

“БелЗАН”да 2920 кеше хеҙмәт итә. Бәләбәй кешеләре өсөн был - өйҙәре янында эшләү, ғаиләләре янында булыу өсөн яҡшы мөмкинлек.

Мин “БелЗАН” коллективын, уның етәкселеген һәм бөтәбеҙҙе лә предприятиеның 50 йыллығы уңайынан ҡотлайым. Яңы үрҙәр һәм тик алға ынтылыш теләйем”, – тип яҙҙы республика Башлығы.

Фото Радий Хәбировтың сәхифәһенән.