Был статус өҫтөнлөк бирә

Башҡортостандың  иҡтисади үҫеш һәм инвестиция сәйәсәте министры урынбаҫары Екатерина Кликунова үткәргән кәңәшмәлә өҫтөнлөклө социаль-иҡтисади үҫеш биләмәләрен (ТОСЭР) үҫтереүгә йүнәлтелгән сараларҙың үтәлеше ҡаралды. Республика иҡтисады өсөн ҙур әһәмиәткә эйә булыуын иҫәпкә алып, бындай биләмәләрҙәге хәл республика Хөкүмәте тарафынан даими контролдә тотола.

Кәңәшмәлә республиканың мо­ноҡалалары вәкилдәре ТОСЭР-ҙың бөгөнгө һәм киләсәктә ҡушылыу­ҙары ихтимал булған резиденттары менән нисек эшләүҙәре тураһында һөйләне. Бынан тыш, быйылғы икенсе ярты йыллыҡта Моноҡа­ла­ларҙы үҫтереү фонды аҡсаһын тотоноу пландары ла иғтибар үҙә­гендә булды. Ошо Фонд Рәсәй тө­бәк­тәренең һәм муниципаль берә­мектәрҙең ҡаҙналарына инфраструктура объекттарын төҙөү йәки үҙгәртеп ҡороу буйынса сығым­дар­ҙы 95 процентҡа тиклем финанслай.

Төп доклад менән “Бәләбәй” ТОСЭР-ының бөгөнгө инвесторы – “Мебель-Мастер” яуаплылығы сик­ләнгән йәмғиәте директоры Вера Шәңгә­рәева сығыш яһаны. Предприятие кухня, офистар һәм сауҙа предприятиелары өсөн мебель етештереү менән шөғөлләнә. Дөйөм инвестиция күләме – 24,7 миллион һум, 21 яңы эш урыны булды­рыл­ған. Инвестпроектты 2021 – 2025 йылдарҙа ғәмәлгә ашырыу күҙ уңында тотола. Ошо уҡ ТОСЭР-ға инвестор булырға теләгән “РемДизельСнаб” вәкиле үҙ проекты тура­һында һөйләне: ул ауыл хужалығы өсөн техника етештерә, автотранспортты техник хеҙмәтлән­дереү һәм ремонтлау, автомобиль деталдәре сауҙаһы менән шөғөл­ләнә. Планлаштырылған инвестиция күләме – биш миллион һум, 20 өҫтәмә эш урыны ҡаралған.

– Бөгөнгә республика моноҡа­лалары биләмәләрендә төрлө проекттарҙы тормошҡа ашырған инвесторҙар федераль һәм төбәк кимәлендәге ярҙам сараларынан файҙалана ала, – тине Екатерина Кликунова. – ТОСЭР статусы һиҙе­лерлек өҫтөнлөктәр бирә. Беҙ рес­публиканың моноҡалаларына фе­де­раль финанслауҙы йәлеп итеү өҫ­төндә лә даими эш алып барабыҙ.

Рәсәй Федерацияһы Хөкүмәтенең 2014 йылдың 29 июлендә ҡабул ителгән 1398-р ҡарарында билдә­ләнгәнсә, беҙҙең республикала алты моноҡала иҫәпләнә. Уларҙың сиктә­рендә әле биш ТОСЭР эшләй: Бәләбәй, Күмертау, Благовещен, Нефтекама һәм Белорет.

- Рәшит КӘЛИМУЛЛИН