Беҙҙе яңы инвестиция проекттары көтә

Бөгөн Хөкүмәттәге оператив кәңәшмәлә беренсе вице-премьер – иҡтисади үҫеш һәм инвестиция эшмәкәрлеге министры Рөстәм Моратов төбәктә инвестициялар үҫеше тураһында һөйләне.

Уның белдереүенсә, инвестиция проекттарын тормошҡа ашырыу өсөн төп майҙан – “Алға” махсус иҡтисади зонаһы. Ул Стәрлетамаҡ һәм Ишембай райондарында урынлашҡан. 2022-2024 йылдарҙа бында электр, һыу менән тәьмин итеү селтәрҙәре, автомобиль юлдары һәм килеү өсөн тимер юлдар төҙөләсәк. Был 8,5 миллиард һумлыҡ шәхси инвестициялар йәлеп итеү мөмкинлеге бирәсәк. Шул уҡ ваҡытта резиденттарҙың һалым кереме ун йылда 7,2 миллиард һум тәшкил итәсәк.

Бынан тыш, республика дөйөм хаҡы 50 миллион һумдан күберәк булған проекттар өсөн инфраструктура төҙөлөшө сығымдарын ҡаплаясаҡ. Был маҡсатта йыл һайын 1,5 миллиард һум аҡса йүнәлтеләсәк.

Инвестиция йәлеп итеүҙең тағы бер юлы – торлаҡ төҙөү һәм уңайлы ҡала мөхите булдырыу. 30 сентябрҙә илдең туғыҙ төбәге инфраструктура кредиты алды, улар араһында Башҡортостан бар, кредит күләме - 14,8 миллиард һум. Был аҡсаны Өфө һәм Нефтекамала яңы биҫтәләр өсөн инженер, транспорт, социаль инфраструктура төҙөүгә тотонасаҡтар.

Мәҫәлән, баш ҡалала 2200 урынлыҡ мәктәп һалынасаҡ. Шулай уҡ транспорт селтәрен үҫтереү объекттары ла барлыҡҡа киләсәк. Бынан тыш, яңы биҫтәләр өсөн ҙур класлы 77 автобус алынасаҡ. Нефтекамала иҫкергән таҙартыу ҡорамалдары төҙөкләндереләсәк.

Дәүләт-шәхси партнерлыҡ принциптарында ВЭБ.РФ дәүләт корпорацияһы менән берлектә Өфө, Нефтекама, Стәрлетамаҡ ҡалалары һәм Өфө районында 15 мәктәп төҙөләсәк. Көньяҡ Уралда ла инфраструктура үҫеше ҡаралған. Мәҫәлән, Сибай – Подольск – Һары тимер юлы, яңы һанлы ярҙамсы электр станцияһы төҙөләсәк, шулай уҡ “Урал” махсус иҡтисади туристик-рекреация зонаһы булдырыласаҡ.

Башҡортостан Башлығы Радий Хәбиров белдереүенсә, республика 15 миллиард һумлыҡ өҫтәмә инфраструктура бюджет кредиты алыу өсөн ғариза биргән. Ул үҙ эсенә Өфө ҡала транспортын үҫтереү, Белорет районында “Морат” курортын үҫтереү өсөн тотоноласаҡ.

– Төбәктең мөһим иҡтисади һәм социаль объекттар төҙөлөшө өсөн аҡса йәлеп итеү өҫтөндә эшләүе бик шәп. Заявкаларҙы сифатлы итеп әҙерләргә, проектты тормошҡа ашырыу шарттарын аныҡ үтәргә кәрәк, – тине Радий Хәбиров.

Фото: Башҡортостан Башлығы сайты.