Урал аръяғы баҫыуҙарына һыу һибәсәктәр

Әбйәлил, Баймаҡ, Учалы, Хәйбулла райондарында мелиорация системаһын төҙөү проектын Башҡортостандың өҫтөнлөклө инвестиция проекттары исемлегенә индергәндәр. Әлеге башланғыс менән “Зауралье Агро”МТС”-ы сыға. Инвестиция күләме 3,6 миллиард һум тәшкил итәсәк. Был хаҡта Башҡортостан Хөкүмәте Премьер-министры урынбаҫары – иҡтисади үҫеш һәм инвестицион сәйәсәт министры Рөстәм Моратов һөйләне.

• Әлеге проект сиктәрендә 10 мең гектар майҙанға мелиорация системаһы төҙөү планлаштырылған. Был майҙанда соя, кукуруз, ужым һәм ярауай культуралар, көнбағыш сәсеү ҡарала. Урал аръяғында ерҙәр уңдырышлы, ужым культураларының юғары сортлыһын – ҡаты боҙайҙы сәсергә мөмкин. Әммә ҡоролоҡ арҡаһында был төбәктә сәсеү майҙаны кәмегәндән кәмей. Был проект 170 кешене эш менән тәьмин итәсәк, - тип билдәләне Рөстәм Моратов.

Инвесторға иһә ауыл хужалығы техникаһын һәм йыһазландырыу һатып алыуға, мөлкәткә һәм һалымға ташламалар ҡаралған.

Сығанаҡ: https://pravitelstvorb.ru/ru/press-office/news.php?ELEMENT_ID=52918

фото: mcx.gov.ru