Министрлыҡ эшенә - юғары баһа

Бөгөн Башҡортостан Хөкүмәтендә Башҡортостандың Ер һәм мөлкәт министрлығы хеҙмәткәрҙәрен бүләкләү тантанаһы үтте. Сара ведомствоға нигеҙ һалыныуҙың 30 йыллығына арналды.

Байрамда Хөкүмәт Премьер-министры Андрей Назаров, республиканың ер һәм мөлкәт мөнәсәбәттәре министры Наталья Полянская, төбәктең "Росрестр" департаменты начальнигы Петр Клетс, ведомство хеҙмәткәрҙәре ҡатнашты.

"Ер һәм мөлкәт министрлығы башҡарған эштәрҙең масштабын аңлау өсөн бер нисә күрһәткесте атап үткем килә: ведомство дәүләт һәм муниципалитет милкендә булған 5,8 миллион гектарҙан ашыу ергә идара итә. Дәүләт милке реестрына 7,5 миллион квадрат метрҙан ашыу майҙандағы күсемһеҙ милек инә. Министрлыҡтың ҡарамағында 25 дәүләт унитар предприятиеһы, өс дәүләт предприятиеһы, республика ҡатнашлығында 57 иҡтисади йәмғиәт эшләй. Дәүләт хеҙмәттәрен һанлаштырыу, инвалид бала тәрбиәләгән, шулай уҡ ишле ғаиләләргә ярҙам итеү өлкәһендәге уңыштарығыҙҙы ла билдәләргә кәрәк", — тине Андрей Назаров ҡотлау телмәрендә.

Ер һәм мөлкәт мөнәсәбәттәре министры Наталья Полянская ведомствоның тотороҡло үҫеш юлына баҫыуын телгә алды.

"Беҙ Дәүләт милкенә идара итеү, Ер ресурстары һәм ер төҙөлөшө буйынса дәүләт комитеттарынан килдек. Эшмәкәрлек барышында 2003 йылда райондар, ҡала округтары биләмәләрендә мөлкәт менән идара итеү буйынса комитеттар булдырып, хатта республиканың иң алыҫ мөйөштәрендә лә ер һәм мөлкәт комплексына идара итеүҙең берҙәм сәйәсәтен ойошторҙоҡ, ә 2021 йылда уларҙы министрлыҡтың үҙәк идаралығы бүлектәренә әйләндерҙеләр. Беҙҙең ведомство хеҙмәткәрҙәренең һаны 550-гә етә. Шуны ла билдәләргә кәрәк: бөгөн үҙебеҙҙең тармаҡ байрамы юҡ. Беҙ 29 октябрҙе Башҡортостандың ер һәм мөлкәт мөнәсәбәттәре хеҙмәткәре көнө тип иғлан иткән закон проектын әҙерләнек", - тине министр.

Сарала Андрей Назаров министрлыҡ хеҙмәткәрҙәрен бүләкләне.

Сығанаҡ:  https://pravitelstvorb.ru/ru/press-office/news.php?ELEMENT_ID=53240

Фото: Башҡортостан Хөкүмәте сайты.