Башҡорт нефтенә 90 йыл тулыу киң билдәләнәсәк

2021 йылдың һуңғы эш көнөндә Башҡортостан Башлығы Радий Хәбиров Башҡортостан нефтенең 90 йыллыҡ юбилейын байрам итеүгә әҙерлек тураһында указға ҡул ҡуйҙы. Был турала ул бөгөн Хөкүмәттә үткән оператив кәңәшмәлә әйтте. Быйыл яҙ Өфөлә һәм Ишембай районында ошо уңайҙан байрам саралары ойоштороласаҡ. Документҡа ярашлы, ойоштороу комитетының яҡынса составы төҙөлгән, бер нисә тантаналы сара үткәреләсәк.

Мәҫәлән, властар юбилейға махсус рәүештә Ишембайҙа Башҡортостан нефтен беренсе асыусылар майҙанын төҙөкләндерергә, шул уҡ исемдәге урамды һәм Блохина, Губкин урамдарын, “Әбей-вышка” мемориаль комплексын төҙөкләндерергә планлаштыра. Шулай уҡ Блохин исемендәге һәм “Бөйөк Ватан һуғышында һәләк булған Ишембай нефтселәренә һәйкәл” скверҙары реконструкция көтә.

Бынан тыш, байрам сиктәрендә Өфөлә төрлө тематик күргәҙмәләр һәм конференциялар үтәсәк, шулай уҡ властар Ишембайға “Хеҙмәт батырлығы ҡалаһы” исемен биреү өсөн үтенес ҡағыҙы бирергә теләй.

Мөһим дата уңайынан тантаналы сара 2022 йылдың майында “Торатау” конгресс-холында ойошторола. Ошонда уҡ тармаҡтың иң яҡшы хеҙмәткәрҙәрен һәм ветерандарын бүләкләйәсәктәр. Указдың үтәлешенә контроллек итеү, шулай уҡ күҙалланған сығымдарҙы финанслау сығанаҡтарын билдәләү республика Хөкүмәтенә йөкмәтелгән.

Фото: wiki-org.ru