OZON компанияһы Благовещен ҡалаһында төпләнәсәк

Рәсәй Иҡтисади үҫеш министрлығы "Озон Өфө" яуаплылығы сикләнгән йәмғиәтен Башҡортостандың "Благовещен" айырым социаль-иҡтисади үҫеш территорияһы реестрына индерҙе. Компания бында яңы логистика комплексын булдырырға ниәтләй.

• Благовещенда логистика үҙәген булдырыу урындағы һатып алыусылар һанын арттырырға һәм уларға беҙҙең республикала баҙарҙың логистика инфраструктураһын файҙаланыу мөмкинлеген бирәсәк. Билдәләп үтергә кәрәк, был инвестиция проектын тормошҡа ашырыу тармаҡта конкурентлыҡ мөхитен үҫтереүгә булышлыҡ итеп кенә ҡалмай, ә 1404 яңы эш урыны булдырыуҙы ла тәьмин итәсәк. Инвестор проектты тормошҡа ашырыуға 2 миллиард һум самаһы аҡса һалырға ниәтләй, — тине республика Премьер-министры Андрей Назаров.

Комплекс тауарҙарҙы ҡабул итеү, һаҡлау, төргәкләү һәм ебәреү, шулай уҡ ҡайтарыуҙарҙы эшкәртеү буйынса хеҙмәттәр ойошторасаҡ. Был инвестиция проектын тормошҡа ашырыу ваҡыты — 2022-2028 йылдар.

Благовещен ҡалаһы ТОСЭР булып 2019 йылдың 12 февралендә ойошторола. Әле унда 33 компания теркәлгән.

Башҡортостан Республикаһында бөтәһе биш айырым социаль-иҡтисади үҫеш территорияһы бар: Бәләбәй, Күмертау, Благовещен, Нефтекама һәм Белорет ҡалалары.

Фото һәм сығанаҡ: Башҡортостан Хөкүмәте сайтынан алынды.