Оҙаҡ йылдар халыҡ тығындарҙа ыҙалай ине

Бөгөн Башҡортостан Башлығы Радий Хәбиров Нуғай ауылы эргәһендә төҙөлгән яңы эстакаданың төҙөлөш өрлөктәрен ҡуйыуҙы күҙәтте.

1,38 миллиард һумлыҡ инфраструктура объектын төҙөү 2021 йылда «Хәүефһеҙ сифатлы юлдар» милли проекты сиктәрендә башлана. Генераль подрядсы ойошма — «Уралмостострой» асыҡ акционерҙар йәмғиәтенең «30-сы Мостотряд» филиалы.

«Уралмостострой» компанияһының директорҙар советы рәйесе Павел Рабухин Башҡортостан Башлығына төҙөлөш урынында тәүлек әйләнәһенә 30 белгес һәм 25 берәмек заманса техника эшләүе хаҡында һөйләне.

«Эстакаданың дүрт таяуын ҡуйыуҙы тамамланыҡ һәм бөгөн оҙонлоғо 33 метр булған өрлөктәр ҡуя башлайбыҙ», — тине Павел Рабухин. — Һәр киҫәктә 12 өрлөк буласаҡ. Ҡоролманың дөйөм оҙонлоғо — 105,6 метр.Яңы эстакада ғәмәлдәге тимер юл үткәүеленән 200 метр алыҫлыҡта урынлашасаҡ. Уны 2023 йылдың йәйендә ғәмәлгә индереү планлаштырыла", - тине ул.

Ике һыҙатлы юл буйлап көн һайын 50 меңгә тиклем автомобиль Зинин, Нуғай, Аҡбирҙе, Ҡарамалы, Шипов, Блохин һәм башҡа ауылдарға тиклем бара. Яңы дүрт һыҙатлы юл үткәүеле был йүнәлештә юлдың үткәреү һәләтлелеген арттырасаҡ.

Өфө хакимиәтенең Төҙөлөш, юлдарҙы ремонтлау һәм яһалма ҡоролмалар буйынса идаралыҡ начальнигы Константин Паппе билдәләүенсә, тимер юл аша үткән юлды күпер менән алмаштырыу  юл-транспорт ваҡиғалары һанын кәметергә булышлыҡ итәсәк. Юл үткәргесте төҙөү урынында Башҡортостан Башлығы эш кәңәшмәһе үткәрҙе, унда "Өфөнөң Көньяҡ ҡапҡаһы" транспорт проекты тикшерелде.

— Был ҡатмарлы комплекс дүрт ҙур контрактты үҙ эсенә ала. Беренсе этап сиктәрендә Пугачев урамын төҙөкләндереүҙе планлаштырабыҙ. Икенсе этапта Кузнецов Затоны биҫтәһендә Пугачёв урамынан Ағиҙел йылғаһы аша күпер менән Өфө-Аэропорт шоссеһына тиклем көньяҡ урау юлын төҙөйәсәкбеҙ. Беҙ был объектты проектлай башланыҡ та инде, — тине Радий Хәбиров. — Шулай уҡ Өфөлә Көнсығыш сығыу юлын әүҙем төҙөйбеҙ, ул баш ҡаланың Галле урамы аша М-5 «Урал» федераль трассаһы менән тоташасаҡ. Алдағы йәй мәшәҡәтле буласаҡ, шуға өфөләрҙе һәм ҡунаҡтарҙы түҙемлерәк булырға саҡырам.

Фото һәм сығанаҡ Башҡортостан Башлығы сайтынан алынды.