Йылды туйҙырыр көндәр

Дүртөйлө районындағы “Шишмә” тоҡомсолоҡ заводы” яҙғы сәсеү эштәрен тамамлау алдында.

Дүртөйлө районындағы “Шишмә” тоҡомсолоҡ заводы” яуаплылығы сикләнгән йәмғиәте уңғандарына бөгөн баҫыуҙа тынғылыҡ юҡ. Механиза­торҙар Илгиз Исламов, Рифҡәт Исхаҡов, Айҙар Саматов көндө төнгә ялғап, ең һыҙғанып, яуаплы, йылды туй­ҙырыр эш менән мәшғүл. К-701 тракторы, “Омичка” сәсеү машинаһы, “Кузбасс” сәсеү комплексы арпа, бойҙай культураларын, һоло, борсаҡ һ.б. сәсә. Рәфис Нуриәхмәтов ужымды өҫтәлмә туҡландыра, водителдәр Венер Миңнитдинов, Рөстәм Сибәғә­туллин, Фәнис Гәрәев, Юлай Маргамов баҫыуға ашлама ташый. Тоҡом­солоҡ заводы директоры Фирҙәүес Мөхәмәт­нур улы Кәбиров, был йыл уңдырышлы булыр, тип фаразлай.

Хужалыҡтың һөрөнтө ер майҙаны – яҡынса 3 мең гектар. Бөгөнгө көнгә 630 гектарҙа ужым, 515 гектарҙа – арпа, шулай уҡ ярауай бойҙай (330 га), рапс (140 га), борсаҡ (50 га), көн­бағыш (95 га) сәселгән. Бер гектар сә­сеү майҙанына 36,6 килограмм ашлама тура килә. Тиҙҙән 100 гектар майҙанда ҡарабойҙай сәсергә йыйыналар, орлоҡ етерлек кимәлдә әҙерләнгән.

Тоҡомсолоҡ заводында 349 баш Бестужев һәм 120 баш ҡара-сыбар тоҡомло һыйыр малы үрсетелә. Хужалыҡта 97 кеше эшләй. Ат ҡараусы Ғәни Гәрәев, һауынсылар Флүрә Голова, Вәзимә Әхмәтшина үҙ эштәренә бик яуаплы ҡарай. Һәр ҡара-сыбар тоҡом һыйырҙан уртаса йыллыҡ һауым — 7000 килограмм, Бестужев тоҡомонан 6000 килограмм һауып алына. Һөт тәүлегенә 6 тонна һатыла – Бөрө, Дүртөйлө “СЫРОТОРГ” һөт комбинатына тапшырыла.

“Бестужев тоҡомло малдар әлеге көндә йәйләүгә әҙерләнә”, – ти Фир­ҙәүес Мөхәмәтнур улы. Ул тоҡомсолоҡ заводын 2019 йылдан алып етәкләй. Ошо уҡ райондан, Арғымаҡ ауылынан. Башҡортостан ауыл хужалығы институтының зоология факультетын тамамлаған. Талапсан етәксе тыуған еренең һулышын тоя, кешеләренең холоҡ-фиғелен яҡшы белә, ауыл хужалығы хеҙмәтсән­дәренең һәр береһе менән уртаҡ тел таба.

Ит һәм һөт һатыу, мал аҙығы культуралары сәсеү менән әүҙем шөғөл­ләнгән “Шишмә” тоҡомсолоҡ заводы” яҙғы сәсеү эштәрен ваҡытында тамамлай. Көҙөн дә, хужалыҡ хеҙмәт­кәрҙәре әлегеләй тырышлыҡ, егәрлелек күрһәтһә, йыл матур килһә, мул уңыш алыуға ирешер.

Тәнзилә ДӘҮЛӘТБИРҘИНА.