Бөтә яңылыҡтар
Иҡтисад
24 Май 2022, 15:45

“Газ.Нефть.Технологиялар - 2022” күргәҙмәһе яңы мөмкинлектәр асты

Ейәнсура районының Иҫәнғол ауылының 254 йорт хужалығы газ селтәренә тоташа аласаҡ

“Газ.Нефть.Технологиялар - 2022” күргәҙмәһе яңы мөмкинлектәр асты
“Газ.Нефть.Технологиялар - 2022” күргәҙмәһе яңы мөмкинлектәр асты

Бөгөн Башҡортостан Хөкүмәте Премьер-министры Андрей Назаров 30-сы “Газ. Нефть. Технологиялар” күргәҙмә-форумын асыуҙа ҡатнашты. Сарала ҡатнашыусыларҙы сәләмләп, Андрей Назаров форумдың ошо йылдар дауамында нефть һәм нефть эшкәртеүсе төбәк булараҡ, Башҡортостандың визит карточкаһына әүерелеүен билдәләп үтте.

  • Нефть химияһы сәнәғәте Башҡортостандың үҫеш нигеҙе булып тора. 90 йыл элек беренсе нефть сығанағы асыла. Шул ваҡыттан алып Башҡортостан үҙгәрә һәм ауыл хужалығы тармағы үҫешкән республика ғына түгел, сәнәғәт республикаһына ла әүерелә. Башҡортостан иң ауыр йылдарҙа илдең флагманы һәм таянысы булды. Бөйөк Ватан һуғышында беҙҙең ятҡылыҡтар һәр өсөнсө танк һәм һәр бишенсе самолетты яғыулыҡ менән тәьмин итте, ә һуғыштан һуң илебеҙҙе тергеҙеүгә этәргес көс булды.
    Беҙҙә ҡеүәтле холдингтарға ингән предприятиелар бар — "Газпром", "Роснефть", "Сибур". Был компаниялар әүҙем инвестиция сәйәсәте алып бара. Улар даими рәүештә урындағы сәнәғәт тармаҡтарын үҫтерә һәм республикала эш урындары һанын арттыра. Юбилей күргәҙмә-форумының бизнес-программаһы бай, ул йылдан-йыл тармаҡтың иң яҡшы эксперттарын йыя. Компаниялар һәм власть органдары вәкилдәрен, ғалимдарҙы һәм тармаҡ эксперттары “түңәрәк өҫтәл” артына йыйылып, көнүҙәк мәсьәләләрҙе хәл итә алыуы ҡыуандыра, — тине Андрей Назаров.

Андрей Назаров "Башнефть" акционерҙар йәмғиәтенең генераль директоры Андрей Лазеев һәм "РН-кат" яуаплылығы сикләнгән йәмғиәте генераль директоры Альберт Сафин менән берлектә үткәрелгән телекүпер режимында РН-Кат предприятиеһында гидрокракинг катализаторҙарын сәнәғәткә ебәреү тантанаһында ҡатнашты.

Форум нигеҙендә үткәрелгән төп ваҡиғаларҙың береһе – гидрокрекинг катализаторҙарҙың сәнәғәт производствоһын асыу. Ул вакумлы газойлдән юғары сифатлы Евро-5 мотор яғыулығын сығарыуҙы арттырыу мөмкинлеген бирәсәк. Уны етештереү менән Башҡортостанда Стәрлетамаҡ катализаторҙар заводы нигеҙендә “Башнефть” составына ингән “РН-кат” компанияһы шөғөлләнә.

— "Газ. Нефть. Технологиялар" күргәҙмәһе башҡорт нефтенең барлыҡҡа килеү тарихын ғына түгел, ә заманса технологияларҙы, етештереү ҡеүәттәрен, алдынғы эшләнмәләрҙе һәм дөйөм тармаҡты үҫтереү перспективаларын күрһәтеү өсөн бик мөһим сара. Йыл һайын форум сиктәрендә яңы производстволар асабыҙ. Бөгөн беҙ "РН-кат" компанияһының яңы етештереү селтәрен ебәрҙек, өҫтәмә газлаштырыу буйынса эш алып барабыҙ, — тине Андрей Назаров.

Былтыр "Роснефть" махсуслашҡан "РН-кат" предприятиеһы белгестәре технологик асыш яһай һәм гидрокракинг катализаторын етештереүҙең үҙ технологияһын уйлап сығара. Яңы катализатор менән эшкә Урта Волга нефть эшкәртеү ғилми-тикшеренеү институты белгестәре йәлеп ителә, Новокуйбышев катализатор заводы базаһында уңышлы һынау үтә.

Андрей Назаров, "Газпром Межрегионгаз" яуаплылығы сикләнгән йәмғиәтенең генераль директоры Альберт Лоҡманов, "Газпром Газораспределене" "Өфө" асыҡ акционерҙар ойошмаһының идара итеүсе ойошмаһы һәм Күмертауҙа "Газпром Газораспределение" Өфө бүлексәһе директоры Рөстәм Исхаҡов Ейәнсура районының Иҫәнғол ауылы газ үткәргесенә газ ебәреү тантанаһында ла ҡатнашты.

Дөйөм оҙонлоғо 19 километр булған бүлеү газ үткәргесен төҙөү тамамланыу менән ауылдың 254 йорт хужалығы селтәрҙәргә тоташа аласаҡ.

Сараның Башҡортостанда утыҙынсы тапҡыр үткәрелеүенә аптырарға түгел - республиканың яғыулыҡ-энергетика комплексы оҙаҡ йылдар дауамында табышлы тармаҡтарҙың береһе булып ҡала. Башҡортостан илдә автомобиль бензины, дизель яғыулығы етештереү күләме буйынса беренсе, импортланған нефтте, этилен, ксилол, стирол, синтетик каучукты эшкәртеү йәһәтенән икенсе, нефть сығарыу буйынса өсөнсө урында килә. Быйылғы сараның Башҡортостан нефтен сығара башлауҙың 90 йыллығына арналыуы уға тағы ла мәртәбә өҫтәй. Форумда илебеҙҙең 35 төбәгенән һәм Беларусь Республикаһынан 250 компания ҡатнаша.

Республиканың нефть химияһы тармағының импортты алмаштырыуға индергән өлөшө тос. Сит ил аналогтарына бәйлелекте кәметеү – тотороҡло эштең мөһим шарты.

Форумдың асылыу тантанаһынан һуң, ҡатнашыусылар күргәҙмә менән танышты. “Түңәрәк өҫтәлдәр”ҙә ҡатнашыусылар утыҙ секцияла үткән һөйләшеүҙәрҙә ҡатнаша алсасаҡ. Көн һайын төрлө йүнәлештәге фекер алышыуҙар ҡаралған. Андрей Назаров төрлө ойошмаларҙың эш алдынғыларына төрлө дәүләт наградалары тапшырҙы.

 

Фотолар Башҡортостан Хөкүмәте сайтынан алынды.

“Газ.Нефть.Технологиялар - 2022” күргәҙмәһе яңы мөмкинлектәр асты
“Газ.Нефть.Технологиялар - 2022” күргәҙмәһе яңы мөмкинлектәр асты
“Газ.Нефть.Технологиялар - 2022” күргәҙмәһе яңы мөмкинлектәр асты
Автор:Лилия Нуретдинова
Читайте нас в