Бер аҙнаға иртәрәк тамамлайҙар

Башҡортостанда яҙғы сәсеү эштәре тамамланыу өҫтөндә. Ваҡытлы дәүләт ярҙамы арҡаһында аграрийҙар алдарына ҡуйылған бурысты үтәй алған һәм сәсеүҙе бер аҙнаға алда тамамлайҙар. Был турала бөгөн Республикаға идара итеү үҙәгендә үткән Хөкүмәттең оператив кәңәшмәһендә вице-премьер – ауыл хужалығы министры Илшат Фәзрахманов һөйләне. Ул белдереүенсә, быға ауыл хужалығы эшсәндәре һатып алған заманса техника булышлыҡ иткән.

– Әгәр 2017-2018 йылдарҙа тәүлегенә сәсеү майҙаны 68 мең гектарға етһә, быйыл иһә бер көндә 135 мең гектар сәстек. Беҙҙең бурыс – 200 меңгә еткереү, ул саҡта 14 көн эсендә тыныс ҡына ҡоролоҡ һәм дымлылыҡ араһында маневр яһап, нормативтар буйынса эшләй аласаҡбыҙ. Республикала яҙғы культуралар майҙандарының 95 проценты сәселгән, был 2 миллион 66 мең гектар, уҙған йылғы кимәлдән 41 мең гектарға күберәк. Уларҙың 95 процентын иген һәм ҡуҙаҡлы иген культуралар биләй. Майлы культуралар буйынса план үтәлгән тиерлек. 419 мең гектарға яҡын ерҙә майлы культуралар сәселгән, был уҙған йыл кимәленән 42 мең гектарға күберәк. Ғәҙәттәгесә, көнбағыш 70 процент самаһы тәшкил итте. Майлы культураларҙың ҡалған майҙандарында етен, рапс, соя һәм башҡа майлы культуралар сәселгән. Улар беҙҙең өсөн ғәҙәти түгел, ләкин баҙарҙың үҙгәреүен иҫәпкә алып, был культуралар күләмен арттырабыҙ, – тип билдәләне вице-премьер.

Шәкәр сөгөлдөрөн сәсеү буйынса план 161 гектарға арттырып үтәлгән. Сөгөлдөр 43 мең 365 гектарҙа сәселгән, был уҙған йыл кимәленән 18,5 процентҡа күберәк. Быйыл мул уңыш көтөлә.  

Шулай уҡ мал аҙығы үләндәрен сәсеү дауам итә. Бер йыллыҡ үләндәр 102 мең гектарҙа сәселгән, ул пландың 89 процентын тәшкил итә. Аграрийҙар иң һуң өлгөргән культураларҙың береһе – ҡарабойҙай сәсеүҙе дауам итә, 6 июнгә 40 мең гектарҙан ашыу ерҙә йәки пландың 67 проценты сәселгән (план 60,5 мең гектар).

16 районда яҙғы культураларҙы сәсеү тамамланған, 15 районда эштәр 95 проценттан ашыуыраҡ күләмдә башҡарылған.

Фото: nashikigi.ru