Республикала һалым хеҙмәтенең күсмә офистары эшләй

Рәсәй Федераль һалым хеҙмәтенең Башҡортостан буйынса идаралығы һалым түләүселәр менән үҙ-ара эш итеүҙең төрлө ысулдарын даими камиллаштыра. Атап әйткәндә, һалым түләүселәрҙең күсмә ҡабул итеүҙәрен ойоштороу тәжрибәһен индереү дауам итә – 2022 йылдың 1 июлендә Өфө биләмәһендә халыҡ күп урындарҙа "Мобиль һалым офисы" тигән махсус яҙыулы брендлы микроавтобустар йөрөй башланы.

Күсмә мобиль офис туҡталышының тәүге нөктәһе – "Торатау" конгресс-холы алдындағы майҙан. Артабан микроавтобус, маршрутҡа ярашлы, Башҡортостандың баш ҡалаһы буйлап йөрөйәсәк.   

Мобиль һалым офисына мөрәжәғәт иткән һәр кем һалымдар һәм йыйымдар тураһында ғәмәлдәге ҡануниәт, Рәсәй Федераль һалым хеҙмәте сайтының Интернет-сервистары мөмкинлектәре тураһындағы һорауҙар буйынса мәғлүмәт аласаҡ, бюджет алдында бурыстың булыу-булмауы тураһында мәғлүмәтте аныҡлаясаҡ һәм уны түләү өсөн квитанция аласаҡ.

Шулай уҡ һалым түләүсегә һалымдан тотоп ҡалынған аҡсаны алыуға хоҡуҡты тормошҡа ашырыу һәм башҡа мәсьәләләр хаҡында мәғлүмәт бирелә. Бынан тыш, мобиль һалым офисында теләгән һәр кемгә Рәсәй Федераль һалым хеҙмәте сайтының "Физик берәмектәр өсөн шәхси кабинет" интерактив сервисына тоташырға ярҙам итәләр.  

Күсмә һалым офисы Интернет селтәренә тоташтырылған ноутбуктар, планшеттар, матбуғат ҡоролмалары һәм башҡа мәғлүмәт-коммуникация саралары менән йыһазландырылған.

Федераль һалым хеҙмәтенең Башҡортостан Республикаһы буйынса идаралығының күсмә мобиль офистары эшен ойоштороу маҡсаты булып һалым грамотлылығы кимәлен күтәреү һәм төбәк халҡының һалым мәҙәниәтен формалаштырыу тора.

Күсмә мобиль офистар тураһында тулыраҡ мәғлүмәтте Федераль һалым хеҙмәтенең Башҡортостан Республикаһы буйынса идаралығының ҡыҙыу элемтә телефоны буйынса алырға мөмкин: (347) 226-38-00.

Фото: nalog.gov.ru