Дүртөйлө районы хакимиәте башлығы Риф Йосопов социаль селтәрҙәрҙә бик әүҙем. Ул ауыл эшсәндәре өсөн ҡыҙыу мәл – мал аҙығы әҙерләү мәлен фотоға төшөрөп һалған.
“Фотоларҙа "Вәлиева" тоҡомло мал хужалығы. Ауыл хужалығы эшсәндәре мал аҙығы әҙерләй. Әлегә барыһы ла планға ярашлы бара – һауа торошо һөйөндөрә, шуға күрә ваҡытында бесән сабырға, сифат өсөн эшләргә мөмкин. Быларҙың барыһы ла ҡыш һөттөң етештереүсәнлеген тәьмин итәсәк, малдарҙың ауырлығы артыуы, әлбиттә, яҡшы мал аҙығы базаһына бәйле.
Фотоһүрәттә — Түбәнге Ҡалҡаш ауылынан механизатор Илфаҡ Ғәзетдинов. Иң тәжрибәле эшселәрҙең береһе — 30 йылдан ашыу ошо хеҙмәттә. Көн һайын 80 гектар самаһы бесән сабып тора. Ундай кешеләр тураһында яҙыу һәр ваҡыт ҡыуаныслы – яуаплы, тырыш, үҙ эшенә тоғро”, - тип яҙҙы Риф Йосопов.
Һандарға туҡталайыҡ: районын хужалыҡтары 53 мең тонна сенаж йыйып алды, был планлаштырылғандың яртыһынан күберәген тәшкил итә, ә бесәндең күләме 1700 тоннаға етте.
Фотолар Риф Йосоповтың социаль селтәрҙәге сәхифәһенән алынды.