Ике республика араһы нығый

30 июлдә Баймаҡ районында “Башҡорт аты” республика фестивале майҙансығында Башҡортостан Һәм Ҡалмыҡстан сауҙа-иҡтисади, фәнни-техник һәм социаль–мәҙәни хеҙмәттәшлек тураһында килешеү төҙөнө. Хөкүмәт–ара документҡа   Башҡортостан Башлығы Радий Хәбиров һәм Ҡалмыҡстан Башлығы Бату Хасиков ҡул ҡуйҙы.

Килешеү сауҙа-иҡтисади бәйләнеште үҫтереүгә йүнәлтелгән, шул иҫәптән производство-техник тәғәйенләнештәге продукция һәм  халыҡ ҡулланышы тауарҙары менән тәьмин итеү. Документ шулай уҡ ауыл хужалығы өлкәһендә лә үҙ-ара бәйләнеште күҙаллай. Һүҙ сеймал һәм аҙыҡ-түлек, ауыл хужалығы техникаһы менән тәьмин итеү, үҫемлекселек һәм малсылыҡ өлкәһендә тәжрибә уртаҡлашыу тураһында  бара. Бынан тыш төбәктәр һаулыҡ һаҡлау, мәҙәниәт, мәғариф, спорт һәм туризм өлкәһендә лә хеҙмәттәшлек тураһында килеште.

• Беҙгә ҡалмыҡ туғандар менән эшләүе ҡыҙыҡлы. Тормош  яңы партнерҙар, туризмда, ауыл хужалығында, фәндә, логистикала яңы үҫеш нөктәләре  эҙләүгә этәрә. Ҡалмыҡстандың биләмә мөмкинлеген дә файҙаланыу мөһим, – тине Радий Хәбиров. – Шулай уҡ беҙ Өфөнән Элистаға авиарейстар ойоштороу буйынса ла эш алып барасаҡбыҙ. Был беҙҙең халыҡтарҙы яҡынайта. Башҡортостанда йәшәүселәр өсөн Ҡалмыҡстанды уның ҡыҙыҡлы мәҙәниәте, тарихы,  милли үҙенсәлеге яғынан асырбыҙ, ҡалмыҡтарға – беҙҙең күп яҡлы республикабыҙҙы күрһәтербеҙ.

Ҡалмыҡстан Башлығы төрлө өлкәлә хеҙмәттәшлектең юғары потенциалын билдәләне.

• Беҙҙең республикаларҙа йәшәүселәрҙең күптән бер-береһен белеүҙәрен, аралашыуҙарын, Рәсәй һәм халыҡ–ара сараларҙа осрашыуҙарын күрәбеҙ. Авиабәйләнешкә килгәндә, уны мотлаҡ ойошторорға кәрәк. Бының өсөн барлыҡ мөмкинлектәр бар, - тине Бату Хасиков. – Һеҙҙең эшҡыуарҙарға күрһәткән  преференциялар тураһында ла күп нәмә беләм. Бында ла беҙ тәжрибә менән уртаҡлашырға әҙер. Башҡортостандың әүҙем үҫешеүен күрәбеҙ.

 Фото: Башҡортостан Башлығы сайты.