Теләк кенә булһын!

Быйыл ҡайһы ғына районға барма, ниндәй генә иген баҫыуында туҡталма, туҡ башаҡтарҙың эйелеп ултырыуын, арыш йә бойҙайҙың елгә бәүелеүен күреп, күҙ ҡыуана. Әле ураҡ ҡыҙған мәл. Бер-бер артлы теҙелешкән комбайндар баҫыуҙы иңләй, йөк машиналары ырҙын менән ялан юлына саң ҡундырмай, ҡыҫҡаһы, баҫыу уңғандарына ҡарап тороу үҙе кинәнес. Стәрлетамаҡ тарафтарына юл төшкәндә игендең бураларға һыймай ятыуына беҙ ҙә хайран ҡалдыҡ.

Стәрлетамаҡ районының агро­сәнәғәт комплексын үҫтереү идара­лығы начальнигы Иншар Ғөбәйҙул­линдың оҙатыуында төбәктә генә түгел, Башҡортостанда ла һәр йәһәттән дә алдынғылыҡты бирмә­гән “Дружба” яуаплылығы сикләнгән йәмғиәте ауыл хужалығы предприя­тиеһына юлландыҡ.

– Был хужалыҡтың ерҙәре Ауыр­ғазы һәм Ғафури райондарына терәлеп ята, – тип таныштыра Иншар Мәүлиәр улы. – Күршеләр менән тығыҙ аралашып йәшәйбеҙ, улар беҙҙең бай тәжрибәне өйрәнә, беҙ уларҙың алдынғы эш алымдарын ҡулланабыҙ. Йыл шул тиклем һәйбәт килә. Иң мөһиме – ям­ғыр­ҙар ваҡытында яуҙы, етерлек дым тупланды.

Иншар Ғөбәйҙуллин әйтеүенсә, республикабыҙҙа иң беренсе­ләр­ҙән булып ураҡҡа төшкән Стәр­летамаҡ районы алдынғылыҡты бирмәй, гектар көсө лә ныҡ юғары.   

“Дружба” хужалығының дөйөм ауыл хужалығы ерҙәре бөтәһе 12 мең гектар майҙанға йәйелгән. Ба­ҫыуҙар дөрөҫ эшкәртелгәс, уларға етерлек ашлама индерел­гәс, мул уңыш алына. Шуныһы иғтибарға лайыҡ, был хужалыҡ эшмәкәрлеген башлыса көҙгө куль­тураларҙы сәсеүгә һәм үҫтереүгә көйләгән. Әле бында гектар ҡеүәте – 60-ар центнер.

“Дружба” йәмғиәте идарасыһы Сергей Григорьев хужалығы менән яҡындан таныштырҙы, ҡаҙаныш­тары тураһында һөйләне.

– Алда булһа ҙур теләк, эштән ял таба йөрәк, тигәндәй, эшселәр­ҙең кәйефе күтәренке, һәр кем тырыша, бурысына яуаплы ҡарай, – тине Сергей Леонидович. – Уңыш мул булған һайын, хеҙмәткәрҙәр ҙә эшкә талпынып тора, улар ваҡыт менән дә иҫәпләшмәй. Һәр кем игенде тиҙерәк һәм юғалтыуһыҙ йыйып алыу өсөн көс һала.  

Беҙҙе оҙатып йөрөүселәр менән бергә ҡамылдан атлайбыҙ. “Ҡара­ғыҙ әле, исмаһам, бер бөртөк бой­ҙай күренһәсе, ер үтәнән-үтә күре­неп ята, был комбайнсыларҙың оҫталығын раҫлай”, – тип ҡыуан­дылар.

Ысынлап та, Ишбарс бүлексә­һенең Покровка бригадаһында эш бер минутҡа ла тынғаны юҡ. Ана, уң яҡта, “Акрос-550” маркалы комбайн ҡапыл туҡтаны, бункер башында кинәт кенә ҡыҙыл лампочка тоҡанды. “Бункер тулды, бушатыр­ға әҙермен” тигәнгә ишара был. Шунда уҡ “КамАЗ” йөк автомобиле шул яҡҡа ашыҡты.

Беҙгә алдынғы комбайнсы Олег Корчажников менән әңгәмәләшеү бәхете лә тәтене. Ул Покровка ауылында ғүмер итә, ғаилә ҡорған. Егет Наумовка ауыл хужалығы техникумын тамамлаған, агроном һөнәрен үҙләштергән. Кәләше Екатерина менән шәхси хужалыҡтарын да үҫтерә.

Олег Корчажниковтың һүҙҙәренә ҡарағанда, “Дружба” хужалығы етәкселегенең иң беренсе хеҙмәт­кәрҙәрҙең мәнфәғәтен ҡайғыртыуы үҙҙәренә ҡарата хөрмәт һәм ихтирам уята. “Эш хаҡы ваҡытында түләнә­ме?”, “Өҫтәмә түләүҙәр ҡа­рал­ған­мы?”, “Эшселәрҙең ғаилә­һендә ниндәй мәсьәләләрҙе хәл итергә кәрәк?” – барыһы тураһында ла даими һорашып торалар. Улар­ҙың хәстәрлекле ҡарашын тойғас, маҡсаттарына еңел ирешәләр.

Баҫыу уңғандары иртәнге сәғәт 10-да эште башлай, киске 18 сәғәт­тә ялға туҡтай. Хеҙмәткәр­ҙәрҙе ашатыу ике тапҡыр ойошто­ролған. Әгәр ҙә яланда техника ватыла ҡалһа, ул ошонда уҡ ремонтлана. Ауыл эшсәндәре ураҡты 25 августа тамамларға уйлай.

- Илдар АҠЪЮЛОВ

Стәрлетамаҡ районы