Юрағаныбыҙ юш килде

“Рощинский” акционерҙар йәмғиәтенең дөйөм ауыл хужалығы ерҙәре 30 мең гектар тәшкил итә. Уның ни хәтлем иркен майҙанға йәйелгәнен күҙ алдына килтерәһегеҙме? Ысынлап та, был хужалыҡтың сәсеүлек ерҙәре Ҡаҙағстан далаларылай йәйрәп ята. Стәрлетамаҡ районы ауыл хужалығы идаралығының баш агрономы Виктор Бульц билдәләүенсә, рощинскийҙар өсөн был һис тә сик түгел, унан да күберәк ерҙәрҙе эшкәртеү уңғандарҙың ҡулынан килә.

Хужалыҡтың Покровка бүлегендәге ба­ҫыуы көслө умарта күселәй гөжләп тора. Тигеҙ рәткә теҙелгән тиҫтәнән ашыу урып-йыйыу комбайны бойҙайҙы тура һуға, сөнки игендең нәҡ өлгөргән сағы. Яҫмаларға һалып, бойҙайҙы яңы­нан һуғып алыу юғалтыуҙарға килтереүе ихтимал. Эргәләге муйыллыҡ буйында водителдәр сиратҡа баҫҡан. Кемдер та­ғыл­малы арбаһының берке­телгән уры­ны­ның ныҡлығын ҡайтанан тикшерә, икен­селәр арпа өҫтөнә яба торған брезент палатканы матурлап урай, өсөнсө­ләр иһә “КамАЗ”-дың тәҙрә-көҙгөләрен һөр­тә. Һүҙ ҙә юҡ, комбайн­сыларҙың “бун­кер тулды” тигән сигналын күреү менән шул яҡҡа ашығасаҡтар.

“Рощинский” акционерҙар йәмғиәте директоры Радик Рафиҡов һөйләүенсә, улар йыл да тиерлек дөйөм сәсеүлек майҙандарының өстән ике өлөшөнә иген культуралары сәсә, быйыл да тап шулай эшләгәндәр. Бөгөнгөләй мул уңыштың ҡасан булғанын урта быуын, йәштәр ту­ра­һында һүҙ ҙә юҡ, бөтөнләй хәтер­лә­мәй, ә өлкәндәр генә дөрөҫ итеп әйтә ала, шуға күрә иген күп булһа ла, уны әләф-тәләф итергә юл ҡуйырға ярамай, киреһенсә, ҡәҙерен белеү мөһим.

Был хужалыҡ игенде Покровка бүле­ге­нең яланынан Аҡкүл станцияһы ауы­лында (Ғафури районы) урын­лашҡан “Аҡкүл элеваторы” яуаплылығы сиклән­гән йәмғиәтенә ташый. Ара әллә ни йы­раҡ түгел, ни бары 25 километр ғына. “КамАЗ” водителе Рәфис Айытбаев бел­дереүенсә, хәҙерге тигеҙ юлдарҙан бер тиҙлектә рәхәтләнеп йөрөйһөң, өҫтәүенә, элеваторҙа игенде ҡабул итеү яҡшы ойошторолған, элекке шикелле сират көтөп йонсомайҙар.

Әйткәндәй, был хужалыҡта һәммәһе лә бурысына яуаплы ҡарай. Владимир Карачевский, Юрий Цветков кеүек тырыш водителдәр, Петр Воронков, Фларит Сәйфуллин, Александр Япрынцев һымаҡ сәмсел комбайнсылар – шуға асыҡ ми­ҫал. 

Йөк машинаһын көткән арала ком­байн­сы Фларит Сәйфуллин менән һөй­ләш­тек. Яуын-төшөмдөң ваҡытында бу­лы­уының ни тиклем ҙур роль уйнауына баҫым яһаны ул.

– Беҙҙең яҡтарҙа, ғөмүмән, күп урында, яҙғы сәсеү бөтөү менән ямғырҙар яуып үтте, – тине әңгәмәсем. – Тап кәрәк саҡта яуғанына ныҡ ҡыуандыҡ. Нәҡ шул ваҡытта уҡ көҙ мул уңыш алырбыҙ ул, тип хеҙмәттәштәрем менән фараз иткәй­нек. Бына бәхет, юра­ғаныбыҙ юш килде. Бойҙайҙы усҡа алыу – ниндәй кинәнес! Бына ошо яландан тура тирмәнгә алып бар ҙа он тарттыр.

Фларит Сәйфуллин фекеренсә, бындай мул уңышҡа өлгәшеү бәхете һәр саҡ йылмаймай, шуға күрә лә, берен­се­нән, игенде юғалтыуһыҙ йыйып алыу за­рур. Икенсенән, уны дөрөҫ итеп һаҡлау тураһында ла онотмаҫҡа кәрәк. 

Беҙ ҡайтыр яҡҡа юлланғанда Радик Рафиҡов Покровка бүлегенең 761 гектар майҙанды биләгән арыш баҫыуында эш­тең тамамланыуы тураһында хәбәр итте. Яҡынса фаразлауҙар буйынса, бында гектар көсө 60-ар центнер тирәһе булған! Артабан ялан батырҙарының оло юлдың теге яғындағы баҫыуға төшәсәктәрен дә өҫтәне.

Илдар АҠЪЮЛОВ

Стәрлетамаҡ районы.