Байрамығыҙ менән, финанс өлкәһе хеҙмәткәрҙәре!

Башҡортостан Хөкүмәте Премьер-министры Андрей Назаров Финансистар көнөнә, шулай уҡ Рәсәй Федерацияһының Финанс министрлығына нигеҙ һалыныуға 220 йыл тулыуға арналған тантаналы сарала ҡатнашты. Ул тармаҡ хеҙмәткәрҙәрен һөнәри байрамдары менән ҡотлап, уларҙы дәүләт наградалары менән бүләкләне. Республика Хөкүмәте етәксеһе социаль селтәрҙәрҙә лә ҡотлау яҙмаһы ҡалдырҙы.

"Бөгөн беҙ икеләтә байрам – Финансистар көнөн һәм Рәсәй Финанс министрлығына нигеҙ һалыныуҙың 220 йыллығын билдәләйбеҙ.

Һөнәрегеҙ һәр ваҡыт ихтирамлы булды, сөнки ҡаланың, төбәктең, тотош илдең дөйөм финанс сәйәсәте тап һеҙгә бәйле. Башҡортостанда Финанс министрлығы республика менән бер үк ваҡытта, 1919 йылда, ойошторола. Ул саҡта Финанстарҙың халыҡ комиссариаты тип атала. Шул ваҡыттан алып республика ведомствоһы башҡарма властың төп органдарының береһе булып ҡала.

Финансистарҙың яйға һалынған хеҙмәте арҡылы Башҡортостан инде 10 йылдан ашыу Рәсәй Финанс министрлығының баһаламаһы буйынса төбәк финанстары менән идара итеүҙең I йәки II дәрәжә сифатҡа эйә булған субъекттар төркөмөнә индерелә. Һуңғы биш йылда республикабыҙҙың тупланма бюджеты 200-ҙән 300 миллиард һумға тиклем артты.

Беҙ социаль өлкәне тулыһынса финанслайбыҙ, бизнесҡа булышлыҡ итәбеҙ, граждандарыбыҙҙың йәшәү сифатын арттырыу өҫтөндә эшләйбеҙ. Финанс министрлығы федераль пилот проекттарында әүҙем ҡатнаша, шулай уҡ яңы идеялар тәҡдим итеп тора. Инициативалы бюджетлауҙы үҫтереү проектын тормошҡа ашырыуҙа пионерҙар булдыҡ. Бер нисә йыл буйы "Жилстройсбережения" программаһын уңышлы тормошҡа ашырабыҙ. Финанс һәм бюджет буйынса белемде күтәреү өҫтөндә эшләйбеҙ.

Былтыр республика социаль заказ тураһындағы федераль законды ғәмәлдә ҡулланып ҡараған пилоттар исемлегенә инде. Ә ағымдағы йылдың июлендә был мәсьәлә буйынса бөтә Рәсәй семинар-кәңәшмәһен үткәреү өсөн нигеҙ булып торҙо.

Хеҙмәттәштәр, һөнәри байрамығыҙ менән! Ысын күңелдән һеҙгә сәләмәтлек, бәхет, муллыҡ һәм һөнәри эшмәкәрлегегеҙҙә артабан да уңыштар теләйем!" – тип яҙҙы Андрей Назаров.

Сығанаҡ: t.me/agnazarov/476