Студенттар “Өфө” паркында уҡыясаҡ

Башҡортостан Хөкүмәтенән хәбәр итеүҙәренсә, “Өфө” индустриаль паркында етештереүгә әҙерлек сиктәрендә уның резиденты “Smart Office” компанияһы Өфө урман техникумы менән килешеү төҙөнө.

Документҡа ярашлы, уҡыу йорто студенттары ошо предприятиела стажировка үтәсәк, унда мебель эшләү серҙәрен өйрәнә аласаҡ. Иң яҡшы студенттарҙы оҙаҡламай был паркта асыласаҡ предприятиеға эшкә ҡабул итәсәктәр.

“Квалификациялы кадрҙар – уңышлы эшләгән предприятиеның төп таяныстарының береһе. Беҙҙең резиденттың компанияһы үҫештәге яңы этабын башлаған мәлдә яңы эш урындарын булдырыу һәм юғары класлы белгестәр әҙерләү мөһим роль уйнай. Һәр практикант төрлө ҡорамалда эшләп ҡарай һәм ниндәй йүнәлеш үҙенә оҡшауын һайлай ала”, – тине Башҡортостан Үҫеш корпорацияһының генераль директоры Наил Ғәббәсов.

Компания вәкилдәре билдәләүенсә, стажировканан тыш, практиканттар конкурста ла ҡатнашасаҡ, уның һөҙөмтәләре буйынса иң яҡшылар тип табылғандар Мәскәүгә мебель күргәҙмәһенә барасаҡ.

Фото: Башҡортостан Хөкүмәте.