Асҡын районында урмансылар көнө үтте

Асҡын районында Урман эшселәре көнөнә арналған саралар үтте. Бында 150-нән ашыу кеше йыйылды: Башҡортостан урмансылары, урман участкаларын ҡуртымға алыусылар, тармаҡ ветерандары һәм башҡалар.

Байрамда Башҡортостан Хөкүмәте премьер-министры урынбаҫары — Башҡортостан Республикаһының ауыл хужалығы министры Илшат Фәзрахманов, Волга буйы федераль округы буйынса урман хужалығы идаралығы начальнигы Александр Орнатский, Башҡортостандың урман хужалығы министры Марат Шәрәфетдинов, Башҡортостандың тәбиғәттән файҙаланыу һәм экология министры Нияз Фазылов, Асҡын районы хакимиәте башлығы Динис Йосопов ҡатнашты.

Көн программаһы көсөргәнешле булды. Беренсенән, Ҡышлауйылға ауылы эргәһендә урынлашҡан Төлгөҙ быуаһы эргәһендә урман ҡырҡыу буйынса ярыш үтте, унда биш кешенән торған ике команда ярышты: бысҡыны әҙерләү, ботаҡтарҙы киҫеү һәм башҡа һынауҙарҙа иң күп мәрәйҙе Асҡын урман хужалығында ағас әҙерләү бригадаһы оҫтаһы Рәзил Муллаянов йыйҙы.

— Беҙҙең районда һөнәри оҫталыҡ конкурсы икенсе тапҡыр үткәрелә, беренсе тапҡыр 2019 йылда ойошторолғайны. Ҡағиҙәләр халыҡ-ара кимәлдәге кеүек, шуға ла еңелдән булманы. Әммә урмансылар бөтә оҫталығын һәм талантын күрһәтте, — тине конкурстың баш судьяһы, Асҡын урман хужалығы директоры Мөнир Низамов.

Артабан сарала ҡатнашыусылар 150 йүкә һәм миләш үҫентеһе ултыртты. Урмансылар аллеяһы урманды тергеҙеү башланғысы менән бөтә Рәсәйҙә үткәрелгән «Урманды һаҡлайыҡ» акцияһына старт биреү булды.

Тантаналы саралар урындағы ансамблдәрҙең һәм коллективтарҙың сығыштары оҙатыуында барҙы. Шулай уҡ халыҡ ижады һөнәрселәренең күргәҙмәләре, ағас йыһаздар, урман һәм урман янғыны сараларында ҡулланылған заманса ҡорамалдар күргәҙмәһе ойошторолдо. 

Сараның рәсми өлөшө "Танып" шифаханаһы базаһында үтте. Урман хужалығындағы көнүҙәк мәсьәләләр буйынса докладтар тыңлағандан һуң, тармаҡты үҫтереүгә ҙур өлөш индергән хеҙмәткәрҙәр бүләкләнде. «Башҡортостан Республикаһының атҡаҙанған урмансыһы» тигән почетлы исем быйыл 15 кешегә бирелгән, шул иҫәптән Асҡын урман хужалығы кафедраһы мөдире Марсель Ғабдрахманов, Инйәр урман хужалығы директоры Айвар Хәмәҙиев, Маҡар урман хужалығы директоры Сәлим Хафизов һәм башҡалар бүләкләнгән. Урмансылар эше күп кенә федераль һәм республика наградалары менән дә билдәләнгән.

Фотолар Башҡортостандың урман хужалығы сайтынан алынды.