"Гидравлика"ға эшселәр кәрәк

Бөгөн Республикаға идара итеү үҙәгендә ойошторолған Хөкүмәттең аҙналыҡ кәңәшмәһендә “Гидравлика” Өфө агрегат предприятиеһының үҫеш мөмкинлектәрен тикшерҙеләр.

Ул илебеҙҙә етештерелгән һауа судноларында ҡулланылған авиатөҙөлөш өсөн продукция сығарыуҙа махсуслаша. Төп заказсылары – Берләшкән авиатөҙөлөш корпорацияһы, Берләшкән двигателдәр эшләү корпорацияһы, “Иркут” корпорацияһы, “Рәсәй вертолеттары” һәм башҡалар.

Импортҡа алмаш программаһы нигеҙендә предприятиела 29 төр изделие сығарыу үҙләштерелгән, элек уларҙы сит илдәрҙән һатып алғандар. 2018-2021 йылдарҙа уларҙы ғәмәлгә ашырыу күләме ике тапҡырға артҡан һәм 400 миллион һум тәшкил иткән.

– “Гидравлика” Рәсәйҙәге яңы МС-21 пассажир һауа лайнерҙарын әҙерләүҙә ҡатнаша. Беҙ фильтрҙар модулдәрен, фторопласт рукавтарын һатырға һәм унан һуң хеҙмәтләндереүгә килешеү төҙөнөк. Шулай уҡ үҙебеҙҙең ҡеүәттә МС-21, “Сухой Суперджет Нью” самолёттары өсөн ярҙамсы ҡулайламалар сығарыуҙы ойошторорға әҙербеҙ. Бының өсөн илдең төп авиация юғары уҡыу йорттары менән бер нисә килешеү төҙөнөк, – тине Виктор Новиков. – Бөгөн беҙҙә заказдар менән проблема юҡ. Эшсе кадрҙарға ихтыяж бар – 400-ләгән вакансия.

Башҡортостан Башлығы профилле министрлыҡ һәм ведомстволарға төбәктең сәнәғәт предприятиелары өсөн инженер-техник, эшсе кадрҙар әҙерләү эшен көсәйтергә ҡушты.

– Был – беҙҙең дөйөм бурыс, уны күмәкләп хәл итербеҙ, – тип билдәләне Радий Хәбиров. – Шул уҡ ваҡытта предприятиеларҙа лайыҡлы эш хаҡы тәьмин итеү мөһим.

Фото: Башҡортостан Башлығы сайты.