Көн ҡаҙағына һуҡҡан мәсьәлә – йылылыҡ

Башҡортостандың торлаҡ-коммуналь хеҙмәттәр министры вазифаһын башҡарыусы Ирина Голованова, Дәүләт Думаһы депутаты Павел Качкаев, Республиканың Тарифтар буйынса дәүләт комитеты рәйесе Светлана Бурдюк һәм башҡа белгестәр Башҡортостан Юлдаш телеканалында үткән брифингта ҡатнашты. Тура эфирҙа барған тапшрыуы мәлендә көн ҡаҙағында торған ҡыҙыу мәсьәләләрҙең береһе – йылытыу осорона әҙерлек тураһында һүҙ барҙы.

— Йыл һайын Башҡортостандың йылытыу миҙгеленә әҙерләнеүгә айырым яуаплылыҡ менән ҡарайбыҙ. Бөтә муниципалитеттар ҙа тейешле процедуралар үткәрә, отчет биреүҙең айырым формалары бар, уларға ярашлы энергия һаҡлау буйынса ҡайһы бер сараларҙың ни тиклем һөҙөмтәле булыуын һәм уларҙың тулыһынса үтәлгәнме-юҡмы икәнлеген барлайбыҙ, — тип һыҙыҡ өҫтөнә алды Ирина Голованова.

Шулай уҡ фекер алышыу барышында Башҡортостандың торлаҡ-коммуналь хеҙмәттәр министры вазифаһын башҡарыусы күп фатирлы йортта йылы иҫәпләү ҡоролмаһының өҫтөнлөктәре һәм уны ҡуйыу шарттары хаҡында һөйләне.

— Күп фатирлы йортта дөйөм йылылыҡ иҫәпләү ҡоролмаһы ҡуйылған осраҡта, бында йәшәүселәр йылылыҡ ресурсы өсөн сумманы уны ҡулланғандан һуң түләй. Дөйөм хаҡты ошо йортта йәшәгән халыҡ иҫәбенә, дөйөм йыйылыш үткәреп, идарасы компанияға тапшырып ҡуйырға мөмкин, — тине Ирина Голованова.

Башҡортостан Республикаһының Тарифтар буйынса дәүләт комитеты рәйесе Светлана Бурдюк йылытыу нормалары Рәсәй Хөкүмәте указына ярашлы иҫәпләнә, тип билдәләне. Нормативтарҙы билдәләгәндә Дәүләт комитеты төҙөлөш климатологияһында сағылдырылған мәғлүмәттәргә таянып эш итә, уға ярашлы йылытыу осороноң уртаса көнө — 216, ул 30,4-кә бүленә, был бер ай эсендәге көндәр һаны һәм уртаса алғанда тулы булмаған айҙы, 8 айҙы иҫәпкә ала.

— Коллегаларыбыҙ менән бөтә фәндәр араһында Волга буйы федераль округында йылытыу осороноң оҙайлығына анализ үткәрҙек. Һөҙөмтәлә уларҙың күбеһе бер үк осорға тура килә. Барыһы ла климатҡа бәйле. Мәҫәлән, Ямал-Ненец автономиялы округы өсөн был осор — 9 ай, Краснодар крайы өсөн — 7 ай, Сочи өсөн — 6 ай, — тине Светлана Бурдюк.

Коммуналь хеҙмәттәргә тарифтарҙың үҙгәреүе тураһында һөйләгәндә, 2022 йылға тарифтар былтыр декабрҙә билдәләнде: беренсе ярты йыллыҡта үҫеш булманы, ә 1 июлдән коммуналь хеҙмәттәргә тарифтарҙы индексациялау үткәрелде. 

— Дәүләт комитеты үҙ ҡарарҙарында федераль ҡануниәткә таянып эш итә.  Федераль кимәлдә ҡабул ителгән барлыҡ норматив хоҡуҡи акттар тарифтарҙы ҡарауҙа һәм раҫлауҙа сағыла. Әлегә тарифтарҙың артыуын көтмәйбеҙ. Әле тариф кампанияһы бара, унда 2023 йылға тариф мәсьәләләре ҡарала. Социаль-иҡтисади үҫештең ағымдағы фаразын һәм федераль ҡануниәттәге үҙгәрештәрҙе көтәбеҙ, — ти Светлана Бурдюк.

— Әгәр йылытыу сентябрҙә, хатта айҙың һуңғы көндәрендә башланһа, түләү тулы айға алына һәм киләһе йылдың апреленә тиклем тигеҙ иҫәпләнә. Октябрҙә йылытыу миҙгеле башланыу шарты менән халыҡ хеҙмәт өсөн октябрҙән майға тиклем норма буйынса түләй. Был күп фатирлы йорттарҙа дөйөм ҡуланылған йылылыҡты иҫәпләүсе приборы булмаған йорттарға ҡағыла. Быға тиклем ул 1/12 ине, ләкин 2019 йылдан был сумма 1/8-гә күсерелде, — тип аңлатты Башҡортостан Республикаһының торлаҡ-коммуналь хеҙмәттәр министры вазифаһын башҡарыусы.

Бынан тыш, белгестәр йортто йылытҡанда ни өсөн ҡайһы бер фатирҙарҙа йылылыҡ булмауы тураһында фекер алышты.

- Бындай хәл йылытыуы түбән булған йорттарҙа була, тимәк, үҙәк йылытыу системаһын көйләү өсөн өҫкө ҡаттағы фатирҙарға инеп, системаны һауанан таҙартырға кәрәк, — ти Ирина Голованова.