Көнсығыш юлы төҙөлөшөндә эштәр ҡыҙыу бара

Башҡортостан Хөкүмәтенән хәбәр итеүҙәренсә, республикабыҙҙа иң эре инфраструктура проекты уңышлы тормошҡа ашырыла. Федераль әһәмиәткә эйә М-5 “Урал” автомобиль юлына Өфө аша сығыу юлы төҙөлөшөнөң (Көнсығыш юлы) йылдам барыуы шуға асыҡ миҫал. Бөгөнгә уның әҙерлеге 70 процент тәшкил итә.

– Өфө йылғаһы аша, Көнсығыш юлында, өр-яңы күпер төҙөлөшөнә ҡоролмаларҙы быйыл февралдә һала башланыҡ, – тип һөйләй республикабыҙҙың транспорт һәм юл хужалығы министры Александр Булушев. – Эш бик ҡатмарлы һәм яйлап ҡына дауам итә. Бында эштәр 2023 йылдың ғинуар айында тамамланырға тейеш.

Башҡортостан концессион компанияһының генераль директоры Асабали Закавов әйтеүенсә, күперҙең дөйөм оҙонлоғо – 470 метр, металл конструкцияһының ауырлығы – биш мең тонна тирәһе.

Әле тулыһынса алты нығытманы урынлаштырғандар, күпер конструкцияһы ҡаплау шырҙырмаһының һул яғында эштәр – 51 процентҡа, ә уң яғында 41 процентҡа тамамланған.

Ошо Көнсығыш юлын файҙаланыуға тапшырыу (Салауат Юлаев проспекты менән М-5 федераль трассаһын тоташтыра) – күп мәшәҡәттәрҙән арындырасаҡ. Уның аша йөрөү түләүле буласаҡ. Бынан тәүлек һайын 22 мең автомобиль үтәсәк, М-5 трассаһынан баш ҡалабыҙҙың үҙәгенә, тығындарҙа тормайынса, ун минут эсендә барып етергә мөмкин, ти белгестәр.

Фото: Башҡортостан Хөкүмәте.