"Ростех" менән килешеү төҙөлдө

"Ростех" дәүләт корпорацияһы менән Башҡортостан Республикаһы араһында стратегик партнерлыҡ тураһында килешеүгә ҡул ҡуйылды. Ул 2030 йылға тиклем иҫәпләнгән. Был турала социаль селтәрҙәрҙә республиканың сәнәғәт, энергетика һәм инновациялар министры Александр Шельдяев яҙҙы.

"Беҙ Хеҙмәт министрлығы һәм Мәғариф министрлығы менән берлектә тормошҡа ашыра торған 28 сараны билдәләнек. Килешеүҙең иң мөһим пункттарының береһе – "Ростех" дәүләт корпорацияһы предприятиелары менән студенттарҙы маҡсатлы уҡытыу буйынса йыл һайын килешеүҙәр төҙөү.

Студенттар өсөн практика, уҡытыусылар өсөн стажировкалар күберәк буласаҡ. Килешеүҙә шулай уҡ уҡытыусыларҙы һәм етештереү буйынса уҡытыу оҫталарын дәртләндереү ҡаралған.

Сығарылыш студенты эйә булырға тейешле компетенциялар исемлеге төҙөләсәк. Уларға өйрәнер өсөн беҙҙең колледждарҙа һәм юғары уҡыу йорттарында йыһазландырылған лабораториялар күберәк буласаҡ, заманса ҡорамалдар барлыҡҡа киләсәк, заводтарҙа практика базаһы киңәйәсәк.

Килешеүҙә өҫтәмә компетенциялар йыйылмаһына эйә булған сығарылыш студенты тураһында айырым билдәләнде. Мәҫәлән, станоктарҙы көйләүсе, шулай уҡ токарь, фрезлаусы, слесарь, электромонтер, станок һәм слесарь эштәре контролеры белеме лә биреләсәк.

Әлбиттә, ундай белгесте үҙебеҙҙән ебәрә алмайбыҙ. Маҡсатыбыҙ ҙур – ошо программа буйынса әҙерлек үткән йәш белгестәрҙең кәм тигәндә 80 процентын республиканың "Ростех" предприятиеларына эшкә урынлаштырыу", — тиелә яҙмала.

Мәғлүмәт, фото: vk.com/sheldyaevrb