Сәнәғәт буйынса координация советы ултырышы үтәсәк

Башҡортостан Хөкүмәтенән хәбәр итеүҙәренсә, сараның маҡсаты – сәнәғәт экспортына булышлыҡ итеү ҡоралдары һәм өҫтөнлөклө импорт тураһында фекер алышыу. Ултырышҡа Рәсәй төбәктәренең сәнәғәт министрҙары йыйыласаҡ, ул Рәсәй Хөкүмәте рәйесе урынбаҫары  – сәнәғәт һәм сауҙа министры Денис Мантуров етәкселегендә үткәрелә.

“Координация советы юҡҡа ғына Өфөлә үткәрелмәй. Башҡортостан – Рәсәй сәнәғәт сәйәсәтен тормошҡа ашырыуҙың йоғонтололоғо буйынса ике тапҡыр алдынғы булып танылған төбәк. Беҙҙә күрһәтерлек нәмәләр бар. Сәнәғәт – иҡтисадтың 300 меңгә яҡын кешеһен берләштергән мөһим секторҙарҙың береһе”, – тине Башҡортостан Хөкүмәте Премьер-министры урынбаҫары – сәнәғәт, энергетика һәм инновациялар министры Александр Шельдяев.

Совет ултырышында ҡатнашҡандар “Сәнәғәт үҙәге” индустриаль паркын һәм Авиация технологиялары технопаркын, Зубов ауылындағы пластик торбалар заводын ҡараясаҡ, Өфө трансформатор заводының һәм “ОДК-УМПО” берекмәһенең уҡытыу майҙансыҡтарының эше менән танышасаҡ.

Фото: Башҡортостан Хөкүмәте сайтынан.