“Миловка паркы”нда йорттар файҙаланыуға тапшырыла

Өфө районының "Миловка паркы" торлаҡ комплексында 4-се кварталдың дүрт проблемалы йорто төҙөлөп бөткән. Объекттарҙы Федераль территориаль үҫеш фонды механизмдары ярҙамында һәм Башҡортостан Республикаһы ҡатнашлығында файҙаланыуға тапшырыуға өлгәшкәндәр.

"Биш ҡатлы дүрт йорттоң дөйөм майҙаны — 18,9 мең квадрат метр. Фатир асҡыстарын 400-гә яҡын алданған өлөшсө аласаҡ", — тине Башҡортостандың төҙөлөш һәм архитектура министры урынбаҫары Артем Ковшов.

Әлеге ваҡытта Өфө районы хакимиәте ведомство-ара хеҙмәттәшлек ярҙамында Росреестрҙың Башҡортостандағы департаментына йорттарҙы кадастр теркәүгә ҡуйыу буйынса документтар пакетын ебәргән.

"Артабан йорттарҙың коммуналь инфраструктура объекттарын ресурстар менән тәьмин итеүсе ойошмаларға тапшырыу һәм идара итеүсе ойошма менән килешеүҙәрҙе тамамлау буйынса эштәр башҡарылырға тейеш", — тине Башҡортостандың алданған өлөшсөләр хоҡуҡтарын яҡлау фонды генераль директоры урынбаҫары Тимур Ғиниәтуллин.

Йорттарға почта адрестары бирелгән: Башҡортостан Республикаһы, Өфө районы, Миловка ауылы, Сирень бульвары, 2, 4; Аксакова урамы, 1, 3.

Фондтың Күҙәтеү советы "Миловка паркы" торлаҡ комплексының 22 йортон ҡараны. 13-сө һәм 14-се кварталдарҙағы ике йорт өсөн аҡсалата компенсация түләү буйынса ҡарарҙар ҡабул ителә.

2021 йылда 10-сы кварталдың 4-се һәм 5-се һанлы йорттары төҙөлә, 2022 йылдың йәйендә 5-се кварталдың 2-се йорто һалына. Йәмғеһе 331 өлөшсө үҙ хоҡуҡтарын тергеҙәсәк.

2023 йыл аҙағына тиклем "Миловка паркы" торлаҡ комплексының 3, 8, 9, 11-се кварталдарында акционерҙарҙың хоҡуҡтарын тергеҙеү планлаштырыла.

Белешмә:

"Башҡортостан Республикаһы өлөшсөләренең хоҡуҡтарын яҡлау фонды" коммерцияға ҡарамаған ойошмаһы 2019 йылдың 26 авгусында Башҡортостан Республикаһы Башлығы указы менән төбәктең уртаҡ төҙөлөшөндә ҡатнашыусылар алдында банкрот тип танылған төҙөүселәрҙең йөкләмәләрен яйға һалыу маҡсатында ойошторола. "Миловка паркы" торлаҡ комплексында дөйөм майҙаны 100 мең квадрат метрҙан ашыу булған 28 йорт төҙөлөп бөтмәгән. Шуларҙың 60 мең квадрат метрҙан ашыуы өлөшсөләргә һатылған. "КилСтройИнвест" яуаплылығы сикләнгән йәмғиәте торлаҡ комплексын төҙөүсе була, ул үҙ йөкләмәләрен үтәмәй һәм фатирҙарҙы акционерҙарға тапшырмай.

Ғәмәлдәге ҡануниәткә ярашлы, 2020 йыл аҙағында Башҡортостан Арбитраж суды банкрот төҙөүселәрҙең хоҡуҡтарын һәм йөкләмәләрен күп фатирлы йорттар төҙөүҙе тамамлау буйынса Башҡортостандың өлөшсөләр хоҡуҡтарын яҡлау фондына тапшырыу тураһында ҡарар ҡабул итте.

Фото: "Башинформ".