Зөбәйер ҡымыҙ бешәсәк

Йәрмәкәй районы фермеры Зөбәйер Ғаджиев ҡымыҙ етештереүгә һигеҙ миллион һумлыҡ грант отҡан. Был хаҡта Башҡортостан Башлығы Радий Хәбировтың бизнес менән аралашыу төркөмөндәге яҙмаһына таянып, ”Башинформ” хәбәр итә.  

Билдәле булыуынса, эшҡыуар ҡатыны менән бергәләп милли эсемлек етештереү менән шөғөлләнә. Уларҙың ферма һәм аҙыҡ әҙерләү цехы бар, ер участкаларын ҡуртымға алғандар, Учалынан тоҡомло бейәләр һәм бер нисә ҡолон килтергәндәр.

“Былтыр апрель айында Зөбәйер Ғаджиев Йәрмәкәй районы хакимиәтенең “Инвестиция сәғәте”нә мөрәжәғәт итте. Осрашыу һөҙөмтәһендә республика Ауыл хужалығы министрлығының конкурс комиссияһына “2022 йылда Башҡортостанда ғаилә фермаларын үҫтереү” федераль программаһында ҡатнашыу өсөн заяка ебәрҙек. Һөҙөмтәлә фермер конкурста еңеүселәрҙең береһе булды”, – тине райондың бизнес-шәрифе Эльвира Мирғәсимова.

Фото: Радий Хәбировтың бизнес менән аралашыу төркөмө.