Ужым культуралары нисек ҡышлаған? ч

Башҡортостанда 318,9 мең гектар ужым культуралары сәселгән, шуларҙың 122,4 мең гектарында – арыш, 188,5 мең гектарҙа – бойҙай. Республиканың күпселек райондарында ғинуарҙың тәүге декадаһында агрометеорологик шарттар ярайһы уҡ ҡаты була. Һыуыҡ булыуға ҡарамаҫтан, ужым культуралары артыҡ бирешмәгән. Ваҡытында ятҡан ҡар ҡатламы һәм тупраҡтың бер аҙ туңыуы сәсеүлектәрҙе һаҡлап ҡалған, тип билдәләй агрономдар.

Ғөмүмән, Башҡортостанда ужым куль­ту­раларының 95 проценты яҡшы һәм ҡәнәғәт­лә­нер­лек, ни бары биш проценты насар хәлдә тип баһалана. Рәсәй Ауыл хужалығы үҙәгенең Баш­ҡортостан буйынса филиалы белгестәре билдәләүенсә, баҫыуҙарҙың ҡарлы участкаларынан һаҡланмаған һәм боҙ ҡатламы аҫтында ҡалған өлөшө зыян күреүе мөмкин.

Ужым культураларының торошон күҙәтеү ғинуар урта­һында башланды, ул мартҡа тиклем дауам итә. Һәр районда сәсеүлектәрҙең дөйөм торошон, йәшәүгә яраҡлылығын билдә­ләү, ауырыуҙар һәм ҡоротҡос­тарҙың булыу-булмауын тик­шереү тиҙ арала сара күреүгә һәм буласаҡ уңышты һаҡлап ҡалыуға нигеҙ булып тора.

Мәҫәлән, ошо көндәрҙә Дәү­ләкән районында сәсеү­лектәр буйынса тикшереү үткәрелгән. Районда 18 мең гектар ужым культуралары сә­селгән. Мониторинг һөҙөмтәләре буйынса муниципалитетта ужым куль­тураларының 75 процентының торошо яҡшы тип баһалана, ҡә­нәғәт­ләнерлек тигән баһа алған күләм 20  процент тәшкил итә. Борай районында ужым куль­тураларының 96 проценты яҡшы тип табылған. Бәләбәй районының ҡайһы бер хужа­лыҡ­тарында ла ошондай уҡ тик­шереү үткәрелгән, унда ҡар япмаһының бейеклеге урыны менән 35-40 санти­метрға етә, ти белгестәр.

Лилиә НУРЕТДИНОВА