"Шифа" балалар лагеры янында өлкәндәр өсөн дә шифахана төҙөләсәк

Башҡортостан  Хөкүмәте хәбәр итеүенсә, «Урал аръяғы-2023» Бөтә Рәсәй инвестиция һабантуйы барышында республика Хөкүмәте Премьер-министры Андрей Назаров Сибайҙа «Шифа» балалар ял һәм һауыҡтырыу үҙәге төҙөлөшө менән танышты.

Премьер-министр лагерь төҙөлөшө проекты менән танышты. Әлеге ваҡытта проектлау-инженер тикшеренеүҙәре, нуль этабы буйынса проект һәм эш документтарын әҙерләү һәм экспертиза үтеү эштәре тамамлана. Тамамлау ваҡыты - 2023 йылдың июнь аҙағы. Шул саҡта уҡ төҙөлөшкә рөхсәт алыу планлаштырыла.

- Объектты төҙөү хаҡы өс миллиард һум тәшкил итәсәк, республика ҡаҙнаһынан капиталь грант күләме - 756 миллион һум. Лагерь бер сменала 350 баланы ҡабул итә аласаҡ. Лагерь үҙ ишектәрен 2024 йылдың 1 сентябренә асыр тип планлаштырыла, - тип билдәләне Премьер-министр.

Биләмә ете автобусҡа иҫәпләнгән иркен туҡталҡа менән йыһазландырыласаҡ, насар һауа торошо өсөн япма, шулай уҡ багажды тапшырыу өсөн үҙәкләштерелгән урын ҡаралған.

Бынан тыш, бында иң ҙур ябыҡ спорт залы - 45х24 метрлыҡ ҙур һәм мини-футбол өсөн тулы форматлы майҙанлы спорт зонаһы буласаҡ. Лагерь бассейны Өфөнөң Көрәш һарайындағы кеүек буласаҡ - оҙонлоғо буйынса олимпия стандарты менән - 25х16 метрлыҡ дүрт юл. Шулай уҡ уйын майҙансығы ҡаралған, унда үҫмерҙәр насар һауа шарттарында шөғөлләнә аласаҡ.

Майҙансыҡты ҡарау барышында Андрей Назаров концессия килешеүен әҙерләп, өлкәндәр өсөн һауыҡтырыу комплексын (ял, спа, һауыҡтырыу) үҙ эсенә аласаҡ икенсе проект булдырырға тәҡдим итте. Икенсе концессия проектын булдырыу мәсьәләһе Башҡортостан Башлығы менән тикшереләсәк. Төҙөлөш майҙансығында «Шифа» комплексын төҙөү графигы планына ла ҡул ҡуйылды.

- Әлеге ваҡытта ғәмәлгә ашырыу графигы раҫланды. Объекттың беренсе сираты 2024 йылдың 1 сентябрендә тапшырылырға тейеш. Ресурстар менән тәьмин итеүҙе, инфраструктураны, концепцияны эшләп бөтөүҙе тикшерҙек, - тине Андрей Назаров.

Премьер-министр ай ярым эсендә балалар лагеры эргәһендә өлкәндәр шифаханаһын төҙөү буйынса шәхси концессия башланғысы биреү өсөн концепция әҙерләргә ҡушты.

Фото: Башҡортостан Хөкүмәте сайтынан