Бергә эш итер өлкәләр күп

28 июндә Өфөлә X Рәсәй һәм Беларусь төбәктәре форумы майҙансығында Башҡортостан Башлығы Радий Хәбиров Иркутск өлкәһе губернаторы Игорь Кобзев менән аралашты.

Осрашыуҙа иҡтисадтың төрлө өлкәләрендә, шул иҫәптән химия сәнәғәтендә төбәк-ара хеҙмәттәшлекте нығытыу мәсьәләләре тикшерелде.

Мәҫәлән, “Рус водороды” вертикаль интеграцияланған химия комплексы, уға “Башҡортостан сода компанияһы” һәм “СНХЗ” төркөмө предприятиелары инә, яңыраҡ Иркутск өлкәһе Хөкүмәте менән Усолье-Сибирск ҡалаһында “Усольехимпром” предприятиелары майҙансығында Федераль химия үҙәген ойоштороу мәсьәләләре буйынса хеҙмәттәшлек тураһында килешеү төҙөлдө. Ҙур химия холдингы проекттың төп инвесторы буласаҡ.

- Беҙ Иркутск өлкәһе менән әүҙемерәк эшләргә теләйбеҙ, ошо төбәккә сәфәр мөмкинлектәрен тикшерәбеҙ. Бергә үҙ-ара килешеп эш итеү өсөн яҡшы урындар табырбыҙ тип ышанам, – тине Радий Хәбиров. – “Рус водороды”на һәм “Башҡортостан сода компанияһы”на килгәндә, яңы проекттарҙы ғәмәлгә ашырыу буйынса амбициялы пландарҙы хуплайбыҙ һәм ошо йәһәттән тейешле ярҙам күрһәтергә әҙербеҙ.

Игорь Кобзев Башҡортостан етәкселегенә төбәк-ара кооперация бәйләнештәрен үҫтереүгә булышлыҡ итеүсе X Рәсәй һәм Беларусь төбәктәре форумын әҙерләгәне өсөн рәхмәт белдерҙе.

– Форум юғары ойоштороу кимәлен күрһәтте. Башҡортостандан өйрәнерлек нәмәләребеҙ бар. Бик яҡшы эш майҙансығы, бик матур ҡала, – тине Игорь Кобзев. – “Рус водороды” һәм уға ингән Иркутск өлкәһендәге предприятиелар ҡатнашлығындағы проект – ябай түгел. Ул аҙ һәм урта тоннажлы химияла компетенциялары булған предприятиеларҙы индустриялаштырыу күҙлегенән бик мөһим.

Игорь Кобзев ике яҡлы хеҙмәттәшлекте үҫтереү йүнәлештәрен тикшереү өсөн Башҡортостан делегацияһын Иркутск өлкәһенә саҡырҙы.

Фото: Башҡортостан Башлығы сайты.