“Ҡарлуғас”тың пассажирҙары бер миллионға етте

Бәхетле билет Өфө яғыулыҡ-энергетика колледжының 4-се курс студенты Диана Ғәбделмәноваға яҙған булып сыҡты. Ул – бөгөн “Ҡарлуғас” ҡала яны поезының миллионынсы пассажиры. Куйбышев тимер юлы, Башҡортостандың Транспорт һәм юл хужалығы министрлығы  һәм “Башҡортостан ҡала яны пассажирҙар компанияһы” йәмғиәте етәкселәре  миллионынсы пассажирҙы ҡотлап, иҫтәлекле сувенирҙар тапшырҙы.

– Бындай яҡшы һөҙөмтәгә өлгәшеү өсөн бергәләп электропоездарҙың инновацион хәрәкәт итеү составын һәм “Орлан” рельс автобустарын ҡулланып, уңайлы һәм тәьҫирле маршрут селтәре булдырҙыҡ, – тип билдәләне Куйбышев магистраленең территориаль идаралығы буйынса начальник урынбаҫары Дмитрий Новиков.

Республикала бөтәһе өс “Ҡарлуғас” эшләй. Улар Өфө – Абдуллин, Өфө - Аша һәм Өфө ҡала агломерацияһы сиге маршруттарын хеҙмәтләндерә. Йыл аҙағына тиклем ике өҫтәмә состав килеүе көтөлә, улар популяр йүнәлештәрҙә файҙаланыласаҡ. Бынан тыш, сара барышында яңы хәрәкәт  итеү составын – яңы модификациялы  ЭП2ДМ электропоезын презентацияланылар. 7 ноябрҙән башлап ул Өфө ҡала агломерацияһы сиге буйлап йөрөй башлаясаҡ.

 Фото:"Куйбышев тимер юлы" матбуғат хеҙмәте.