Һөрөнтө ерҙәр майҙаны арттырыла

Бөгөн Башҡортостан Хөкүмәте Премьер-министры Андрей Назаров рәйеслегендә Хөкүмәт ултырышы үтте. Унда Башҡортостанда ер мелиорацияһын үҙләштереү мәсьәләһе ҡаралды.

• Төбәктә яҡынса 116 мең гектар ҡулланылмаған һөрөнтө ерҙәр бар һәм ул 2030 йылға тиклем әйләнешкә индерергә кәрәк. Күптән түгел Рәсәй Хөкүмәте төбәктәргә ерҙе мелиорациялау буйынса саралар үткәреү өсөн өҫтәмә аҡса бүлергә ҡарар итте. Был алым һуғарыу-дренаж системаларын, гидравлик ҡоролмаларҙы төҙөү һәм төҙөкләндереү мәсьәләләрен хәл итәсәк. Әле ҡулланылмаған ауыл хужалығы ерҙәрен тиҙ арала әйләнешкә индереү мәсьәләһен ҡарарға кәрәк, сөнки республика федераль бюджет аҡсаһын алыусылар исемлегенә индерелде, - тип билдәләне Андрей Назаров.
• Донъяла климаттың глобаль йылыныуы шарттарында ерҙе һуғарыу – уңыш алыуҙың төп асҡысы булып тора. Башҡортостанда йыл һайын ерҙе мелиорациялау һәм тупраҡ сифатын яҡшыртыуға йүнәлтелгән проекттар тормошҡа ашырыла, – тип һыҙыҡ өҫтөнә алды Башҡортостан Хөкүмәте премьер-министры урынбаҫары – ауыл хужалығы министры Илшат Фәзрахманов.

Һуңғы биш йыл эсендә республикала дөйөм майҙаны яҡынса 3,5 мең гектар булған һуғарыу системаһы сараларының туғыҙ проекты, шулай уҡ өс проект ярҙамында һөрөнтө ерҙәренең уңдырышлылығын арттырғандар.

Йыл һайын республика проекттары ауыл хужалығы ерҙәрен әйләнешкә һөҙөмтәле йәлеп итеү һәм мелиорация комплексын үҫтереү буйынса федераль программаны тормошҡа ашырыуҙа ҡатнаша. Рәсәй Ауыл хужалығы министрлығы 2023 йылға республикаға конкурс һайлап алыуҙы үткән туғыҙ проект сығымдарының бер өлөшөн ҡаплау өсөн субсидия бүлгән.

Ағымдағы йылда Рәсәй Ауыл хужалығы министрлығы "Ауыл хужалығы продукцияһын экспортлау" федераль проекты сиктәрендә ерҙе мелиорациялау проекттарын яңыса һайлап алыуҙы үткәрә. Мәҫәлән, Бүздәк районының "Авилат" хужалығы конкурста еңеүселәрҙең береһе булды. Компания инвестиция проектының беренсе этабын тормошҡа ашырыу сиктәрендә һуғарыу системаһын төҙөүгә киткән сығымдарҙың бер өлөшөн (80 миллион һум) федераль һәм төбәк бюджеттарынан ҡаплай. Уның ҡеүәте — 377 гектар, инвестицияларҙың дөйөм суммаһы — 313 миллион һум. Проектҡа ярашлы, һуғарыу системаһы өсөн 642 гектар һөрөнтө ер булдырыуҙы күҙ уңында тота, был экспорт күләмен һиҙелерлек арттырырға мөмкинлек бирәсәк.

Республика ауыл хужалығы министрлығында ерҙе мелиорациялау проекттарын тормошҡа ашырыуға киткән сығымдарҙың бер өлөшөн ҡаплау өсөн төбәк бюджетынан ауыл хужалығы етештереүселәренә субсидия биреү тәртибе тураһында Башҡортостан Республикаһы Хөкүмәтенең резолюция проекты әҙерләнгән, тип билдәләне үҙ сығышында Илшат Фәзрахманов. Проект Рәсәй Ауыл хужалығы министрлығы һайлап алған ерҙәрҙе мелиорациялау проекттарын тормошҡа ашырыуға киткән сығымдарҙың 50 процентын ҡаплауҙы күҙ уңында тота.

Андрей Назаров проектты раҫларға тәҡдим итте һәм Башҡортостандың Ауыл хужалығы министрлығына федераль бюджет сығымдарын ваҡытында бүлеүҙе тәьмин итергә һәм йыл аҙағына тиклем 1200 гектар тергеҙелгән ерҙәрҙе сафҡа индерергә ҡушты.

Бүздәк районының "Авилат" хужалығы баҫыуҙарында эш мәле.

Автор фотоһы.