Радий Хәбиров Ҡаҙағстанға юлланды

Башҡортостандың Ҡаҙағстанға рәсми сәфәре бөгөн башланды, делегацияны республика Башлығы Радий Хәбиров етәкләй. Эшлекле сәфәргә республика Хөкүмәте ағзалары, министрлыҡтар һәм ведомстволар етәкселәре, бизнес-берләшмә вәкилдәре индерелде.

Сәфәр программаһы осрашыуҙар, эшлекле һөйләшеүҙәрҙ, шулай уҡ Ҡаҙағстан – Башҡортостан эшлекле форумында ҡатнашыуҙы үҙ эсенә ала.

Башҡортостан вәкилдәрен аэропортта Ҡаҙағстандың сәнәғәт министры Ҡанат Шарлапаев ҡаршы алды.

"Һүҙ эш менән нығытылһын өсөн йәнә ҙур делегация булып килдек. Беҙҙең төп сәнәғәт предприятиеларының етәкселәре бар. Иртәгә бик мәшәҡәтле көн буласаҡ: Башҡортостан презентацияһы, B2B форматындағы осрашыуҙар, яңы бәйләнештәр булдырыу ҡаралған. Иң мөһиме, Башҡортостан менән Ҡаҙағстандың хеҙмәттәшлеге мәсьәләләре буйынса эшсе төркөм ултырышын үткәрәсәкбеҙ һәм Ҡаҙағстан Республикаһы етәкселеге менән осрашасаҡбыҙ. Беҙ тышҡы иҡтисади мәсьәләләрҙе, гуманитар хеҙмәттәшлекте, туризмды, элемтә инфраструктураһын үҫтереү мәсьәләләрен ҡараясаҡбыҙ, - тип билдәләне Радий Хәбиров.

Фото: Башҡортостан Башлығы сайтынан алынды.