Һауа торошо ҡамасауламаһа, 12 көндө тамамлайҙар

Бөгөн Республикаға идара итеү үҙәгендә Башҡортостан Башлығы Радий Хәбиров аҙналыҡ оператив кәңәшмә үткәрҙе. Унда яҙғы баҫыу эштәре барышын тикшерҙеләр.

Республика Хөкүмәте Премьер-министры урынбаҫары – ауыл хужалығы министры Илшат Фәзрахманов сәсеү кампанияһының һуңғы стадияһында булыуын хәбәр итте. 20 майға муниципалитет хужалыҡтары 1,174 миллион гектарҙа яҙғы культуралар сәскән, был планлаштырылған майҙандарҙың 58 процентын тәшкил итә. Шул уҡ ваҡытта һигеҙ районда аграрийҙар – яҙғы сәсеү күләменең 80 проценттан ашыуын, Стәрлетамаҡ һәм Ҡырмыҫҡалы райондарында 90 проценттан ашыуын тамамлаған.

Бынан тыш, республикала шәкәр сөгөлдөрөн ултыртыу тамамланған тиерлек, 20 майға эштәр планлаштырылған майҙандарҙың 96 процентында тамамланған.

– Сәсеү кампанияһына 5,3 мең берәмек техника йәлеп ителде, беҙҙең ҡеүәт тәүлегенә 100 мең гектарға тиклем сәсеү мөмкинлеге бирә, – тине Илшат Фәзрахманов. – Уңайлы һауа шарттары һаҡланһа, сәсеү кампанияһын 12 көн эсендә тамамларға планлаштырабыҙ.

Башҡортостан Башлығы Радий Хәбиров республика аграрийҙарына яҙғы баҫыу эштәрен уңышлы башҡарыуҙарын теләне.

Фото: Башҡортостан Башлығы сайты.