Әбйәлилдәге һабантуй сит ил ҡунаҡтарын әсир итте

Бөгөн Әбйәлил районында республикала беренселәрҙән булып һабантуй үтте. Ул “Урал аръяғы-2024” VI инвестиция форумы сиктәрендә ойошторолдо һәм  ике меңләп ҡатнашыусыны һәм 10 меңдән ашыу ҡунаҡ йыйҙы.

Һабантуйҙы асып, Башҡортостан Премьер-министры Андрей Назаров тап ошондай боронғо халыҡ байрамдары Башҡортостандың ысын асылын, уның күп төрлөлөгөн һәм эшһөйәр халыҡтың сикһеҙ ҡунаҡсыллығын күрһәтә тип билдәләне.

- Бөгөн беҙҙең менән инвестиция һабантуйын үткәреү шатлығын уртаҡлашырға донъяның 20-нән ашыу иленән дуҫ-туғандар килде. Бигерәк тә  Үзбәкстан, Ҡытай һәм Белорусь Республикаһының почетлы делегацияларына айырым рәхмәтемде белдергем килә. Ә яҡташтарыма, Башҡортостан халҡына шуны әйткем килә: һеҙҙең тырышлығығыҙ, эш һөйөүсәнлегегеҙ һәм тыуған илгә һөйөүегеҙ республикабыҙҙы илдең иң үҫешкән төбәктәренең береһе итә, - тип һыҙыҡ өҫтөнә алды Премьер-министр.

Әбйәлил районының күркәм урындарының береһендәге һабантуй “Урал аръяғы-2024” VI Бөтә Рәсәй инвестиция форумының тамамланыуына матур нөктә булды. Байрам программаһы сараларға бай ине.

Үҙҙәренең оҫталыҡтарын ҡунаҡтарға 40-лап һөнәрсе – кәсепселәр, тимерселәр,  балта оҫталары, умартасылар, күн оҫталары, ювелирҙар, керамика, кейеҙ баҫыу оҫталары, һандыҡ яһаусылар, ҡурай, ҡумыҙ эшләүселәр һәм башҡалар күрһәтте. Теләгән һәр кем өсөн оҫталыҡ дәрестәре ойошторолдо.

Сара барышында биҙәү-ҡулланма сәнғәте изделиелары күргәҙмә-йәрминкәһе, «Беҙ бергә!» театрлаштырылған тамашаһы, 100 ҡатнашыусынан торған ат парады, ат сабышы, милли көрәш буйынса «Көрәш» ярыштары ойошторолдо, концерт менән профессиональ һәм үҙешмәкәр коллективтар сығыш яһаны.

Фото: Башҡортостан Хөкүмәте сайтынан