Төньяҡ баш ҡаланан ҡунаҡтар килде

Ҡунаҡтар Рәсәй Геройы генерал-майор Миңлеғәле Шайморатов һәм милли геройыбыҙ Салауат Юлаев һәйкәлдәренә сәскәләр һалды. Шулай уҡ көндөң тәүге яртыһында Башҡортостан Республикаһы Дәүләт Йыйылышы – Ҡоролтайҙың Президиум ағзалары менән осрашыу үтте һәм Рәсәй Федерацияһының ике субъекты парламенттары араһында Хеҙмәттәшлек тураһында килешеүгә ҡул ҡуйылды.

Осрашыуҙы асып, Дәүләт Йыйылышы – Ҡоролтай Рәйесе Константин Толкачев Башҡортостан менән Санкт-Петербург араһындағы мөнәсәбәттәрҙең бөтә өлкәләрҙә лә үҫешеүе һәм нығыныуы хаҡында һөйләне.

- Йылдан-йыл тауар әйләнеше арта, туризм тармағында, мәғарифта, фәндә, мәҙәниәттә үҙ-ара эшмәкәрлек киңәйә, предприятиелар һәм ойошмалар араһында тура бәйләнештәр булдырыла, - тине Константин Толкачев. - Һис шикһеҙ, был изге мөнәсәбәттәрҙең нигеҙе илебеҙ тарихында, уның үҫеш үҙенсәлектәрендә, меңдәрсә кешеләр яҙмышында ята.

Башҡортостан Республикаһы Дәүләт Йыйылышы - Ҡоролтай менән Санкт-Петербург Закондар сығарыу Йыйылышының үҙ-ара хеҙмәттәшлек итеүенә­ – 10 йыл. Бөгөн килеп, парламент-ара хеҙмәттәшлек тураһындағы килешеү, заман талаптарын һәм саҡырыуҙарын иҫәпкә алып, яңыртылды.

Ошондай уҡ эшлекле осрашыу Башҡортостан Хөкүмәтендә лә үтте. Төньяҡ баш ҡала делегацияһын сәләмләп, Башҡортостан Республикаһы Хөкүмәте Премьер-министры вазифаһын башҡарыусы Андрей Назаров, Санкт-Петербург менән Башҡортостанды күптәнге дуҫлыҡ мөнәсәбәттәре бәйләй, һуғыш йылдарында Ленинградтан эвакуацияланған предприятиелар һәм учреждениелар, ябай граждандар республиканың заманса тышҡы ҡиәфәтен формалаштырыуға тос өлөш индерҙе, тип билдәләне.

- Бөгөн төбәктәребеҙҙең эшҡыуарлыҡ берләшмәләре үҙ-ара әүҙем эш итә. Ғәҙәттәгесә, Башҡортостан делегацияһы Петербург халыҡ-ара иҡтисади форумы эшендә лә ҡатнаша. Быйыл ғына 100 миллиард һумдан ашыуға килешеүҙәр төҙөнөк. Дөйөм алғанда, беҙҙең хеҙмәттәшлекте үҫтереү буйынса пландар ҙур. Беҙ уны артабан үҫтерергә әҙер, - тип өҫтәне Башҡортостан Хөкүмәте Премьер-министры вазифаһын башҡарыусы.

Санкт-Петербургтың Закондар сығарыу Йыйылышы рәйесе Александр Бельский Башҡортостан ерендә йылы ҡабул иткәндәре өсөн рәхмәт белдерҙе.

Айрат Нурмөхәмәтов фотолары.