“Альтернатива” аныҡ маҡсаттарға ынтыла

Бөгөн, 15 ноябрҙә, Октябрьский ҡалаһына эш сәфәре барышында Башҡортостан Башлығы Радий Хәбиров “Альтернатива” пластмасса изделиелар заводында булды.

Компания көнкүреш ихтыяждары өсөн пластик изделиелар етештереү буйынса Рәсәйҙә һәм БДБ илдәрендә алдынғы урындарҙы биләй. “Альтернатива”ла етештерелгән 2 меңгә яҡын төрлө продукция Рәсәй, Үзбәкстан, Әрмәнстан һәм Абхазия илдәрендә һатыуға сығарыла. Коллективта 2 меңдән ашыу кеше эшләй.

“Альтернатива” заводында етештереүҙең тулы циклы яйға һалынған. Бында йыл һайын 100-гә яҡын ҡатмарлы пресланған форма сығарыла, был Рәсәйҙә иң яҡшы күрһәткес булып һанала. Компания хеҙмәт етештереүсәнлеген арттырыу программаларында әүҙем ҡатнаша һәм “Башҡортостандың иң яҡшы тауарҙары”, “Рәсәйҙең иң яҡшы 100 тауары” конкурстарында танылыу яуланы.

Предприятие биш инвестиция проектын, шул иҫәптән импортты алмаштырыу стратегияһына ярашлы проекттарҙы ла ғәмәлгә ашыра. Улар ял һәм туризм өсөн пластик изделиелар әҙерләүҙе, шулай уҡ балалар тауарҙарын сериялы етештереү өсөн ҡорамалдарҙы яңыртыуҙы үҙ эсенә ала.

“Альтернатива” предприятиеһының генераль директоры Раил Фәхретдинов предприятие өсөн дәүләт ярҙамының мөһимлеген билдәләне.

- Әле Башҡортостанда әүҙем эшләгән ярҙам саралары арҡаһында беҙ производствоны үҫтерә һәм позицияларыбыҙҙы нығыта алабыҙ. Республиканың Сәнәғәтте үҫтереү фонды, шулай уҡ төбәктең Тышҡы иҡтисади бәйләнештәр министрлығы беҙгә килеп тыуған мәсьәләләрҙе тиҙ арала хәл итергә ярҙам итә. Ә форумдарҙа һәм күргәҙмәләрҙә ҡатнашыу хеҙмәттәшлек өсөн яңы бәйләнештәргә һәм мөмкинлектәргә юл аса, - тип һөйләне Раил Фәхретдинов.

Радий Хәбиров заводтың көнәркәшлек һәләтен һәм уның төбәк иҡтисадын үҫтереүгә индергән өлөшөн билдәләне.

- Предприятие көнәркәшлек мөхитендә, эшсе көс арзаныраҡ булған Көнсығыш Азия, Төркиә һәм Төркиә етештереүселәре менән ярышып эшләй. Заводтың үҫешеүен дауам итеүе, эш хаҡы, һалымдар түләүе һәм 2 меңдән ашыу кешене эш менән тәьмин итеүе мөһим. Был – үҫеш өсөн яңы мөмкинлектәр эҙләгән команданың һәм предприятие етәкселегенең ҡаҙанышы, - тине Радий Хәбиров.

Сығанаҡ: glavarb.ru