Беҙҙең төбәктәр бик оҡшаш

Бөгөн, 16 ноябрҙә, Башҡортостанға эш сәфәре барышында Алтай Республикаһы Башлығы Андрей Турчак Башҡортостан Хөкүмәте Премьер-министры вазифаһын башҡарыусы Андрей Назаров менән Башҡорт дәүләт медицина университетында булды.

Ошо хаҡта Башҡортостан Хөкүмәте Премьер-министры вазифаһын башҡарыусы Андрей Назаров социаль селтәрҙәге сәхифәләрендә яңы яҙма менән уртаҡлашты.

"Бөгөн Алтай Республикаһы менән беҙҙең Башҡорт дәүләт медицина университеты араһында мәғариф, ғилми-тикшеренеү, медицина, фармацевтика эшмәкәрлегендә ике яҡҡа ла файҙалы хеҙмәттәшлекте үҫтереү тураһында килешеү төҙөнөк.

БДМУ – Волга буйы федераль округында медицина һәм фармацевтика фәндәре флагманы, уникаль юғары уҡыу йорто. Бында үҙенсәлекле белгестәр эшләй: 1300 белгестең дүрттән өс өлөшө ғилми дәрәжәгә эйә. Бик күп мөһим асыштар яһала, талантлы ғалимдар тәрбиәләнә. Университеттың донъялағы 20 илдең белем биреү һәм медицина ойошмалары менән хеҙмәттәшлек тураһында 81 килешеүе бар.

Ул – беҙҙең вуз-ара студенттар кампусы резиденттары араһында лидерҙарҙың береһе. 5 мең квадрат метрҙан ашыу майҙанда Башҡорт дәүләт медицина университеты өсөн яңы лабораториялар астыҡ, уларҙың барыһы ла эшләй. Кампустың бер нисә ҡатын медицина вузына биреү һәм юғары уҡыу йорттары араһында үҙ-ара эш итеүҙе дәртләндереү дөрөҫ ҡарар булды.

Алтай Хөкүмәтенең Башҡорт дәүләт медицина университеты менән килешеүе бөгөн республикалар башлыҡтары ҡул ҡуйған күп яҡлы хеҙмәттәшлек тураһында килешеү менән нығытылды.

Дуҫлыҡ тураһында ғына килешеп ҡалманыҡ, аныҡ ҡарарҙар ҙа бар. Алтайға квалификациялы табиптар етешмәй. Әлеге ваҡытта беҙҙең тар белгестәр бригадаһы Таулы Алтайҙа эшләй һәм ЛОР бүлектәр проблемаларын хәл итергә ярҙам итә. Юғары технологиялы медицина үҫешендә лә ярҙам күрһәтербеҙ.

Алтай губернаторы вазифаһында Андрей Турчак тәүге визиттарының береһен Башҡортостанға яһаны. Был беҙҙең өсөн бик мөһим. Төбәктәр бик оҡшаш. Бай тәбиғәте лә, ҡунаҡсыллығы ла менән айырылып тора. Хеҙмәттәшлек өсөн йүнәлештәр бик күп. Шуға күрә эш ҡыҙыҡлы буласаҡ!” – тип яҙҙы Андрей Назаров.

Сығанаҡ: https://vk.com/agnazarov