Радий Хәбиров төбәктәрҙе үҫтереү мәсьәләләре буйынса кәңәшмәлә ҡатнашты

Бөгөн, 4 декабрҙә, Башҡортостан Башлығы Радий Хәбиров видеоконференция режимында Рәсәй Президентының Волга буйы федераль округындағы тулы хоҡуҡлы вәкиле Игорь Комаров төбәк етәкселәре ҡатнашлығында үткәргән кәңәшмәлә ҡатнашты. Көн тәртибендә ижтимағи-сәйәси һәм социаль-иҡтисади үҫештең мөһим мәсьәләләре ҡаралды.

Мөһим бурыстарҙың береһе – махсус хәрби операцияла ҡатнашыусыларҙы тыныс тормошҡа йәлеп итеү, уларҙың ғаиләләренә комплекслы ярҙам күрһәтеү. Хәтерегеҙгә төшөрәбеҙ, Башҡортостанда хәрби хеҙмәткәрҙәргә һәм уларҙың ғаилә ағзаларына 40-тан ашыу социаль ярҙам сараһы ғәмәлгә ашырыла. Мобилизацияланғандар һәм ирекмәндәр өсөн республиканан 138 гуманитар ылау ебәрелде. Радий Хәбировтың тәҡдиме менән 2025 йыл республикала Махсус хәрби операцияла ҡатнашыусылар һәм уларҙың ғаилә ағзалары йылы тип иғлан ителде.

Дәүләт башлығы Владимир Путин тарафынан тәҡдим ителгән 14 милли проектты тормошҡа ашырыу ҙа – Президенттың тулы хоҡуҡлы вәкиленең махсус контролендә. Башҡортостанда 2024 йылда улар буйынса финанслауҙың дөйөм күләме 34,9 миллиард һумдан ашыу тәшкил итә, шуның 23,7 миллиард һумы – федераль аҡса.

Кәңәшмәлә шулай уҡ торлаҡ-коммуналь хужалыҡ объекттарының ҡышҡы осорға әҙерлеген тикшерҙеләр. Республикала йылытыу миҙгеле октябрҙән башланды. Барлыҡ күп фатирлы йорттар һәм үҙәкләштерелгән йылытыу системаһы булған социаль әһәмиәтле объекттар йылылыҡ менән тәьмин ителгән. Төбәктең барлыҡ муниципалитеттары йылытыу миҙгеленә әҙерлек паспорттары алған.

Сығанаҡ: glavarb.ru