Был беҙҙең дөйөм Еңеү, бында беҙ берҙәм

7 февралдә Беларусҡа сәфәре сиктәрендә Башҡортостан Башлығы Радий Хәбиров журналистар менән әңгәмәлә республика делегацияһының Минскиҙағы эше һәм белорус партнерҙары менән яңы берлектәге проекттар хаҡында һөйләне.

ХӘБӘРСЕ:

– Радий Фәрит улы, бөгөн Белоруссия Президенты һәм Премьер-министры менән мөһим осрашыуҙар үтте. Уларҙың төп һөҙөмтәләре ниндәй?

Радий ХӘБИРОВ:

– Башҡортостан-Беларусь мөнәсәбәттәренең һуңғы бер нисә йылын ҡараһаҡ, беҙ потенциалды өйрәнгән, бәйләнештәр булдырған, эште ойоштороу өсөн кәрәкле институттар һәм структуралар булдырған башланғыс этапты үттек, тип әйтергә була. Һәм хәҙер беҙ тәрән кооперация һәм бик тығыҙ үҙ-ара ҡаршы хәрәкәт траекторияһына сыҡтыҡ.

Осрашыуҙарҙа хеҙмәттәшлекте үҫтереү буйынса юл картаһының төп положениелары тикшерелде. Сөнки берәй нәмә тураһында һөйләшһәк, ҡуйылған бурыстарҙы үтәргә тейешбеҙ. Мәҫәлән, беҙ Беларустың еңел сәнәғәт тауарҙары өсөн баҙарыбыҙҙы асыу юлынан барабыҙ. Шуға күрә килештек, был эште әүҙем алып барасаҡбыҙ.

Кооперация өлөшөндә ҙур предприятиеларыбыҙ буйынса эштәрҙең нисек барыуын ҡараныҡ. Мәҫәлән, “МАЗ” һәм Өфө троллейбус-трамвай заводының троллейбустар сығарыу буйынса берлектәге проекты. Бында барыһы ла, нигеҙҙә, яҡшы.

Туризм өлкәһен ентекләп тикшерҙеләр. Беҙ “көмөш” йәштәге халҡыбыҙ өсөн “Башҡортостан-Беларусь оҙон ғүмерлелеге” программаһы сиктәрендә бында килеү мөмкинлеген астыҡ. Хәҙер Беларусь Хөкүмәтенә үҙ ветерандары өсөн дә шундай уҡ программа ойошторорға тәҡдим итәләр. Сөнки туристар килгәс, иҡтисад та эшләй – йәшәү, туҡланыу, сувенирҙар. Шуға күрә Беларусь яғы был йәһәттән үҙ мөмкинлектәрен өйрәнәсәк.

Быйыл “Башҡортостан-Беларусь оҙон ғүмерлелеге” бюджеты бында килә алырлыҡ 1,5 мең самаһы кешене йәлеп итергә мөмкинлек бирәсәк, тип раҫлайбыҙ. Был, әйткәндәй, Өфөнән Минскиға тура авиарейстарҙы тултырыуға ла эшләйәсәк. 2025 йылдың мартынан был маршрут буйынса самолеттар аҙнаһына ике тапҡыр оса башлай, туристар өсөн уңайлыраҡ буласаҡ.

Бынан тыш, спорт өлкәһендәге проекттар ентекле тикшерелде. Яңы Көрәш һарайы майҙансығында көрәштең ҡайһы бер төрҙәре буйынса ҙур үҫмерҙәр турниры ойошторорға килештек.

Дөйөм алғанда, һәр һорауҙы логик тамамлауға килтерергә тырышабыҙ йәки, әгәр ул “эшләмәһә”, уны көн тәртибенән төшөрөргә тырышабыҙ. Был да була.

ХӘБӘРСЕ:

– Һуңғы йылдарҙа “АМКОДОР” холдингы, Минск автомобиль заводы, Гомелдең “Коминтерн” фабрикаһы менән әүҙем эшләнегеҙ. Ә бөгөн Александр Григорьевич Лукашенко ла, Роман Александрович Головченко ла Башҡортостан менән хеҙмәттәшлек итергә теләгән яңы предприятиелар хаҡында һөйләне. Бында ниндәй перспективаларҙы билдәләргә мөмкин?

 Радий ХӘБИРОВ:

– Һис шикһеҙ, беҙ Беларусь сәнәғәтенең теге йәки был тармағында юғары компетенциялар күрәбеҙ. Атап әйткәндә, машиналар эшләүҙә. Әммә хәҙер беҙ ил иҡтисады өсөн ауыр осор кисерәбеҙ. Шуға күрә мин Беларусь Премьер-министрына, бюджет мөмкинлектәре сикләнгәнлектән, әлегә уларҙан техника – аграр, коммуналь, төҙөлөш – һатып алырға йыйынмайбыҙ, тип әйттем. Беҙгә шунда уҡ белорус техникаһын – төҙөлөш, коммуналь һәм ауыл хужалығы техникаһын һатып алыу өсөн отошло финанс инструменттары тәҡдим иттеләр. Сәфәрҙән һуң коллегаларыма яңы тәҡдимде анализларға ҡушам. Тормош туҡтамай. Баҫыуҙарҙа уңышты йыйырға, юлдарҙы һәм тротуарҙарҙы таҙартырға кәрәк. Шуға күрә беҙгә яҡшы финанс продукт тәҡдим итһәләр, беҙ бының менән шөғөлләнәсәкбеҙ.

Дөйөм алғанда, көн һайын яңы проекттар, яңы идеялар барлыҡҡа килә. Сөнки, әйтәйек, билдәле осорҙан һуң беҙҙең эшҡыуарҙар, Беларуста эшләргә мөмкин, тип ышана. Бында уларҙы бюрократик ҡаршылыҡтарһыҙ ҡаршы алалар. Беҙҙә лә шул уҡ хәл. Был мәсьәләне лә хәл иттек.

ХӘБӘРСЕ:

– Быйыл Бөйөк Еңеүҙең 80 йыллығын билдәләйбеҙ. Был темаға бәйле ниндәй килешеүҙәр, проекттар, туристик маршруттар буласаҡ?

Радий ХӘБИРОВ:

– Эйе, бында беҙгә Рәсәй Федерацияһының Беларустағы илсеһе Борис Вячеславович Грызлов ярҙам итә. Ул беҙгә Еңеү көнөн байрам итеүҙә ҡатнашыу өсөн Беларусь Республикаһы вәкилдәрен саҡырырға тәҡдим итте. Ә беҙ Беларусь яғы саҡырған осраҡта “Беларусь хәтерләй” сараһында ҡатнаша алабыҙ. Был беҙҙең дөйөм Еңеү, бында беҙ берҙәм. Һәм, моғайын, ошо юбилей саралары сиктәрендә Хәрби Дан урындары буйлап мәктәп турҙарын ойоштора башларбыҙ, һуңынан улар Советтар Союзындағы кеүек элеккесә даими эшләй башлауҙары мөмкин.

Фото: glavarb.ru.