Башҡортостан үҫеш юлында

"Торатау" конгресс-холында Башҡортостандың Тышҡы иҡтисади бәйләнештәр һәм конгресс эшмәкәрлеге министрлығының коллегия ултырышы уҙғарылды.

Башҡортостандың тышҡы иҡтисади бәйләнештәр һәм конгресс эшмәкәрлеге министры Маргарита Болычева әйтеүенсә, Башҡортостан төрлө яҡлап бик күп илдәр менән тышҡы иҡтисади бәйләнештәрҙе булдырған һәм нығытҡан, был эш артабан да дауам итә.

Башҡортостан Хөкүмәте Премьер-министры Андрей Назаров барыһын да республикабыҙ Хөкүмәте исеменән сәләмләне, министрлыҡтың коллегия ултырышының Башҡортостан Хөкүмәтенең Дәүләт Йыйылышы – Ҡоролтай алдында отчет яһауы менән тап килеүе һәр йәһәттән дә отошло булыуын һыҙыҡ өҫтөнә алды.

– Тышҡы иҡтисади бәйләнештәр һәм конгресс эшмәкәрлеге министрлығы ғәйәт ҙур уй-маҡсаттарҙы тормошҡа ашыра, – тине Андрей Геннадьевич. – Визиттарҙы ойоштороу, сит ил делегацияһын ҡабул итеү, бергәләшеп ҙур проекттарҙы бойомға ашырыу, конгресс эшмәкәрлеге, илебеҙҙең дәүләт эшмәкәрҙәрен юғары кимәлдә ҡаршы алыу һәм башҡа эштәр шуға асыҡ миҫал.

Андрей Назаров һөйләүенсә, киләсәккә оло маҡсаттар ҡуйылған, Башҡортостандың иҡтисады йылдам үҫешә. Эш барышында төрлө юҫыҡта ҡаршылыҡтар осрауына ҡарамаҫтан, берҙәм команда булғас, улар тиҙ һәм еңел йырып сығыла.

Артабан Ҡаҙағстандың Рәсәйҙәге ғәҙәттән тыш һәм тулы хоҡуҡлы илсеһе Даурен Абаев, Үзбәкстандың Рәсәйҙәге ғәҙәттән тыш һәм тулы хоҡуҡлы илсеһе Ботиржон Асадов, Белоруссия Республикаһы сауҙа-сәнәғәт палатаһының халыҡ-ара хеҙмәттәшлек һәм күргәҙмәләр эшмәкәрлеге департаментының начальнигы Александр Головарев һәм башҡалар сығыш яһаны.

Фото: Илдар Аҡъюлов.