Социаль ярҙам пакеты даими арта

Бөгөн, 27 мартта Дәүләт Йыйылышы - Ҡоролтайҙың 21-се ултырышында депутаттар республика Хөкүмәтенең былтырғы эш һөҙөмтәләре тураһында отчет тыңланы. Сарала Башҡортостан Башлығы Радий Хәбиров та ҡатнашты.

Республика Хөкүмәте Премьер-министры Андрей Назаров отчет сығышын махсус хәрби операция бурыстарын хәл итеү, яугирҙәргә һәм уларҙың ғаиләләренә ярҙам итеү буйынса башҡарылған эштәргә байҡауҙан башланы. Был маҡсатҡа былтыр 13 миллиард 400 миллион һум йүнәлтелгән.

Башҡортостан Башлығы Радий Хәбиров инициативаһы буйынса республикала шифахана-курорт дауалауынан алып ташламалы газ тоташтырыуға тиклем 43 төбәк ярҙам сараһы ҡабул ителгән һәм ғәмәлдә. Шул уҡ ваҡытта социаль ярҙам пакеты даими арта. Махсус хәрби операция биләмәһенә 146 гуманитар конвой ебәрелгән. Килтерелгән йөктәрҙең дөйөм ауырлығы 15 мең тоннанан ашып китә. Радий Хәбировтың ҡушыуы буйынса республикала махсус хәрби операцияла ҡатнашыусылар өсөн “Башҡортостан геройҙары” төбәк кадрҙар программаһы ғәмәлгә ашырыла башланы.

Башҡортостан үҫешкән социаль өлкәһе менән айырылып тора. Мәҫәлән, былтыр һаулыҡ һаҡлауҙы финанслау күләме 110 миллиард һумдан ашҡан. Шулай уҡ 68 һаулыҡ һаҡлау объектына капиталь ремонт үткәрелгән. 135 тиҙ төҙөлә торған модуль конструкцияһы ҡуйылған (111 фельдшер-акушерлыҡ пункты, 19 табиплыҡ амбулаторияһы, дүрт дөйөм практика табибы офисы, бер участка дауаханаһы). Былтыр төрлө профилле программалар сиктәрендә 279 медицина хеҙмәткәре 280 миллион һумлыҡ компенсация түләүҙәре алды.

– Мәғарифты үҫтереүгә 118 миллиард һумдан ашыу аҡса йүнәлтелгән. Был былтырғы кимәлдән 17 процентҡа күберәк. Беҙҙә мәктәпкәсә белем биреүҙең 100 проценты тәьмин ителгән. Балалар баҡсаларын ремонтлау буйынса федераль программаны тормошҡа ашырыуға ҡушылдыҡ. Уның сиктәрендә 2025 – 2027 йылдарҙа 16 мәктәпкәсә учреждение ремонтланасаҡ. Бында әүҙемлекте арттырасаҡбыҙ. 

1577 урынлыҡ дүрт мәктәп, шул иҫәптән һаулыҡ мөмкинлектәре сикләнгән балалар өсөн “Йондоҙ” белем биреү үҙәге сафҡа индерелә. Тейешле федераль программа сиктәрендә алты мәктәп капиталь ремонтланды. Быйыл тағы ла 35 мәктәпте тамамлайбыҙ. Был маҡсатҡа федераль бюджеттан 1,5 миллиард һум самаһы аҡса йәлеп ителгән. Киләһе йылда 10 меңдән ашыу уҡыусыға иҫәпләнгән туғыҙ мәктәп бинаһын сафҡа индерәсәкбеҙ, – тине Андрей Назаров.

Башҡортостан хаҡлы рәүештә спорт төбәге тип иҫәпләнә. Былтыр тармаҡ бюджеты 10 миллиард һумға яҡынлашҡан. Республикала 141 спорт төрө үҫтерелә. 2,3 миллиондан ашыу кеше физик культура менән шөғөлләнә.

Спорт ҡоролмалары төҙөлөшө темптары һәм уларҙың һаны буйынса төбәк илдә лидерҙар иҫәбендә. Былтыр өс ҙур объект сафҡа индерелде: Көрәш һарайы, Фехтование үҙәге һәм Ишкәкле слалом өсөн ҡоролмалар комплексы. Быйыл йәнә биш спорт объектын сафҡа индереү планлаштырыла. Еңел атлетика манежы менән спорт комплексын һәм олимпия резервы училищеһын, шулай уҡ Бокс прогрессы үҙәген һәм Теннис академияһын проектлау өҫтөндә эштәр бара.

Мәҙәниәтте үҫтереүгә тәүге тапҡыр 16 миллиард һумға яҡын финанслау күләме йүнәлтелгән. Был 2023 йыл менән сағыштырғанда 9,4 процентҡа күберәк.

2024 йылда 123 йәмәғәт киңлеге төҙөкләндерелгән. Был күрһәткес буйынса Рәсәйҙә 7-се урында торабыҙ.

Радий Хәбиров тәҡдим иткән “Башҡорт ихаталары” республика программаһы сиктәрендә 33 муниципалитетта 213 күп фатирлы йортто берләштергән 143 ихата тәртипкә килтерелгән. Был маҡсатҡа бер миллиард һумдан ашыу аҡса йүнәлтелгән.

Былтыр Башҡортостанда сираттағы рекордлы торлаҡ күләме – 3 миллион 348 мең квадрат метр сафҡа индерелгән. Был күрһәткес буйынса республика Волга буйында федераль округында – икенсе, илдә етенсе урынды биләй. 122 мең ғаилә торлаҡ шарттарын яҡшыртҡан.

– Иҡтисади әүҙемлектең төп факторы – үҫешкән юл-транспорт логистикаһы. Беҙ 1220 км автотрассаны норматив хәлгә килтерҙек. 60 километрҙан ашыу автомобиль юлы сафҡа индерелде. 26 күпер һәм юл үткәргес төҙөйҙәр һәм ремонтлайҙар. Был маҡсатҡа Юл фондынан 34 миллиард һум самаһы аҡса йүнәлтелде. Быйыл территориаль заказ күләме 44 миллиард һумға еткерелде, – тине Андрей Назаров.

Былтыр Башҡортостан сәнәғәтенең үҫеше биш проценттан ашыу тәшкил иткән. Тулайым ауыл хужалығы продукцияһы күләме буйынса республика илдең тәүге ун төбәге иҫәбенә инә һәм Волга буйы федераль округында икенсе урынды биләй.

2024 йылда төп капиталға 783,8 миллиард һум инвестиция йәлеп ителгән. 2025 йылда республика Башлығы 800 миллиард билдәһен үтеү бурысын ҡуйҙы. Йыл башына төбәктең инвестиция портфелендә 1,3 триллион һумға 2,3 мең инвестиция проекты иҫәпләнә. Һуңғы алты йылда Башҡортостанда капитал һалыуҙарҙың тотороҡло ыңғай үҫеш күҙәтелә. Уның тупланған темптары буйынса республика – Волга буйы федераль округында беренсе.

Дөйөм алғанда, депутаттар республика Хөкүмәтенең сығышын ыңғай  баһаланы, шулай уҡ ҡайһы бер йүнәлештәргә асыҡлыҡ индереү буйынса һорауҙар ҙа бирҙе.

Фото: БР Хөкүмәте сайтынан.