Рәсәй Хөкүмәте рәйесенә вуз-ара кампус проекты күрһәтелде

Петербург халыҡ-ара иҡтисади форумында Рәсәй Хөкүмәте рәйесе урынбаҫары Дмитрий Чернышенко һәм Рәсәй Президентының Волга буйы федераль округындағы тулы хоҡуҡлы вәкиле Игорь Комаров Башҡортостан стендын ҡараны. Ҡунаҡтар 390 квадрат метр майҙанда урынлашҡан республика экспозицияһы менән танышты.

Бында төбәктең күләмле проекттары, шул иҫәптән Евразия Юғары уҡыу йорттары араһындағы студенттар кампусы тәҡдим ителде. Радий Хәбиров Дмитрий Чернышенкоға һәм Игорь Комаровҡа кампустың икенсе сираты проекты, уның төҙөлөш этаптары тураһында һөйләне. Шулай уҡ Дмитрий Чернышенко менән Игорь Комаров "Берлога" милли киберфизика платформаһы эше менән танышты. Хәтерегеҙгә төшөрәбеҙ, уны Башҡортостанда 2023 йылда Стратегик башланғыстар агентлығы ярҙамында эшләтеп ебәрҙеләр. Презентация сиктәрендә "Росхим" акционерҙар йәмғиәте менән берлектә "Берлога" экосистемаһы проекты – "Киләсәк химия заводы" етештереү уйын-симуляторы тәҡдим ителде. Билдәләп үтергә кәрәк, "Берлога" милли технология башланғысы хәрәкәте "Таланттар" һанлы платформаһы менән интеграцияланған. Дөйөм ҡулланыусылар һаны - 600 меңдән ашыу.

Бөгөн проектты тормошҡа ашырыуға 20-нән күберәк төбәк ҡушылды. Башҡортостанда ғына "Берлога" платформаһына 53 мәғариф ойошмаһы тоташтырылған, улар нигеҙендә 103 киберфизика түңәрәге селтәре йәйелдерелгән. Ошо уңайҙан республика уҡыусылары техник ижадҡа әүҙем йәлеп ителә һәм Рәсәйҙең технология суверенитеты темалары менән таныша.

– Кампустың тулыһынса файҙаланыуға тапшырылыуын түҙемһеҙләнеп көтәбеҙ. Ул кадрҙар һәм технологиялар әҙерләүҙе тәьмин итәсәк. Башҡортостанда уларға мохтаж булған предприятиелар күп, – тине Дмитрий Чернышенко. Вице-премьер шулай уҡ, "Берлога" кеүек проекттар балаларға һәм йәштәргә һөнәри йүнәлеш биреү системаһының мөһим өлөшө булып тора, тип өҫтәне.

Фотолар: Башҡортостан Башлығының матбуғат хеҙмәте.