Был билдә булһа - тимәк сифатлы!

Бөгөн Хөкүмәт кәңәшмәһендә “Башҡортостан продукты” проектын тормошҡа ашырыуҙы тикшерҙеләр. Унда 850-нән ашыу предприятие ҡатнаша, тип билдәләне кәңәшмәне үткәргән Хөкүмәт Премьер-министры андрей Назаров. Улар “Башҡортостан продукты” билдәһе менән билдәләнгән 33 меңдән ашыу төр продукция сығара.

– Проектта ҡатнашыусылар үҙ продукцияһының географияһын киңәйтә. Һуңғы ваҡытта дипломанттар Африка континентын һәм Көньяҡ-Көнсығыш Азия илдәрен үҙләштерә. Мәҫәлән, илдә күркә ите етештереүсе өс предприятие иҫәбенә ингән “Союзпромптица” предприятиеһы Конго һәм Бенинды тауарҙар менән тәьмин итә. Ә төбәктәге иң ҙур туңдырма етештереүсе “Башҡортостан туңдырмаһы” компанияһы Ҡаҙағстанға экспортты 50 тоннаға тиклем арттырҙы. Шулай уҡ ЕАЭС-тың бөтә илдәренә, Таиландҡа һәм Вьетнамға ла оҙатыла. Проект етештереүселәрҙең, сауҙа селтәрҙәренең һәм ҡулланыусыларҙың үҙ-ара файҙалы хеҙмәттәшлеге өсөн һөҙөмтәле платформаға әүерелде, – тине Андрей Назаров.

Проектты тормошҡа ашырыу йәһәтенән эш һөҙөмтәләре тураһында төбәктең сауҙа һәм хеҙмәтләндереү министры Азат Асҡаров хәбәр итте.

– “Башҡортостан продукты” проекты – Рәсәй баҙарындағы позицияларын нығытыу маҡсатында республика предприятиеларына булышлыҡ итеүҙең һөҙөмтәле механизмы. Проект логотибы халыҡ араһында танылыу яуланы һәм аҙыҡ-түлектең республикала тәбиғи сеймалдан эшләнгәнлеген һәм аҙыҡ-түлектең сифатын һәм хәүефһеҙлеген тәьмин итеү өлкәһендә Рәсәйҙең ғәмәлдәге ҡануниәтенә тап килеүен күрһәтә, – тип билдәләне Азат Асҡаров.

Ул хәбәр итеүенсә, проектта ҡатнашыусы 858 кешенең 63-ө ағымдағы йылдың беренсе ярты йыллығында ҡатнашҡан.

– Дипломанттар һаны даими арта, был проекттың һөҙөмтәлелеген һәм республика етештереүселәре араһында уның хеҙмәттәренә ихтыяж булыуын күрһәтә, - тип белдерҙе төбәктең сауҙа һәм хеҙмәтләндереү министры.

Министр билдәләүенсә, “Башҡортостан продукты” проекты төбәк предприятиеларына ярҙам итеүҙә байтаҡ тәжрибә туплаған. Уның арсеналында төрлө кимәлдәге күргәҙмәләр һәм йәрминкәләр, сауҙа мәктәбе уҡытыу семинарҙары, ҡатнашыусыларҙы һәм уларҙың продукцияһын телевидение һәм социаль селтәрҙәр аша танытыу, шулай уҡ B2B форматындағы сауҙа-һатып алыу конференциялары бар.

– Бөгөнгө көндә 426 дипломант төбәк сауҙа селтәрҙәре менән эшләй, ә 387 предприятие үҙ продукцияһын федераль ритейлда һата. Сираттағы сауҙа-һатып алыу конференцияһы 20 августа “Өфөлә ритейл көндәре” төбәк-ара бизнес һәм власть форумы сиктәрендә үтәсәк, – тип өҫтәне Азат Асҡаров.

Ведомство етәксеһе үҙенең сығышында һуңғы биш йылда проекттың күрше төбәктәргә һәм сит илдәргә бизнес-миссиялары һөҙөмтәле булды, тип билдәләне. Проект менән республика предприятиеларына ярҙам итеү буйынса 164 күсмә сессия һәм бизнес-миссия тормошҡа ашырылған.

Проект эшмәкәрлеге һөҙөмтәһендә республика территорияһында һәм унан ситтә дипломанттарҙың продукцияһы тәҡдим ителә. Республика компаниялары продукцияһы Рәсәйҙең бөтә төбәктәрендә төбәк һәм федераль сауҙа селтәрҙәрендә, шулай уҡ айырым сауҙа нөктәләрендә һәм фирма магазиндарында һатыла.

– Проектта ҡатнашыусы 258 предприятие Рәсәй субъекттарына үҙ продукцияһын оҙата, 34 дипломант экспортлаусы булып тора. Төп экспорт йүнәлештәре – Ҡаҙағстан, Үзбәкстан, Беларусь, Төркиә, Ҡытай һәм Ғәрәп Әмирлектәре, – тине Азат Асҡаров.

Бынан тыш, спикер билдәләүенсә, проект дипломанттарының продукцияһын һатып алыусылар ҙа, төрлө тармаҡ профессионалдары ла лайыҡлы баһалай. Бының дәлиле-республика предприятиеларының махсуслаштырылған конкурстарҙа бер нисә тапҡыр еңеүҙәре.

Мәсьәлә аҙағында Андрей Назаров “Башҡортостан продукты” проектына яңы ҡатнашыусыларҙы йәлеп итеү динамикаһын арттырыу кәрәклеген һыҙыҡ өҫтөнә алды.

Ул Сауҙа һәм хеҙмәттәр министрлығына, шулай уҡ Ауыл хужалығы министрлығына муниципаль райондар һәм ҡала округтары хакимиәттәре менән берлектә тейешле мәғлүмәт кампанияһының күләмен һәм интенсивлығын арттырырға ҡушты.