Өфө ныҡлы үҫәсәк

Бөгөн Хөкүмәттең аҙналыҡ оператив кәңәшмәһендә Башҡортостан Башлығы Радий Хәбиров республиканың Өфөлә һәм Өфө районында Өфө аръяғының коммуналь инфраструктура объекттарын төҙөүгә 13,5 миллиард һум күләмендә федераль ярҙам алыуын хәбәр итте.

– Төбәк үҫеше буйынса Хөкүмәт комиссияһы ултырышында беҙ конкурс нигеҙендә Өфө аръяғында һыу менән тәьмин итеү һәм һыуҙы ағыҙыу селтәрҙәрен төҙөү өсөн 5 миллиард һумлыҡ ҡаҙна инфраструктура кредитын алыуға икенсе ғаризаны яҡланыҡ, – тине төбәк етәксеһе.

Башҡортостандың төҙөлөш һәм архитектура министры вазифаһын башҡарыусы Артем Ковшов проектты өс этапта – 2025-2030 йылдарҙа тормошҡа ашырыуҙары хаҡында хәбәр итте. Хәтерегеҙгә төшөрәбеҙ, августа Хөкүмәт комиссияһы президиумы 8,5 миллиард һумлыҡ проекттың беренсе сиратын тормошҡа ашырыуға ғаризаны хупланы.

– Тәүге ике этап сиктәрендә дөйөм оҙонлоғо 100 саҡрымдан ашыу һыу менән тәьмин итеү селтәрен, таҙа һыу резервуарҙары менән өс һыу баҫҡыс станцияһы, 28 километр һыу ағыҙыу селтәре, ике канализация-насос станцияһы төҙөргә, шулай уҡ ҡеүәтте тәүлегенә 44 мең кубометрға тиклем арттырып, Князев һыу алыу ҡоролмаһын реконструкциялауҙы планлаштырабыҙ. Йыл аҙағында конкурс процедураларын үткәрәсәкбеҙ, ә эштәрҙе 2026 йылда башлаясаҡбыҙ, – тине Артем Ковшов. – Шулай итеп, 2030 йылға беҙ һыу менән тәьмин итеү селтәрҙәре менән Өфө аръяғы торлаҡ фондын, 6 миллион квадрат метрҙан кәм булмаған күләмдә торлаҡ төҙөүҙе һәм сафҡа индереүҙе тәьмин итәсәкбеҙ, социаль һәм коммерция объекттарын төҙөү мөмкинлеген булдырабыҙ.

Радий Хәбиров проекттың өсөнсө этабын тормошҡа ашырыуға ғариза әҙерләргә ҡушты.

– Баш ҡалабыҙҙы Өфө ярымутрауынан ситтә – Ағиҙел һәм Өфө йылғалары аръяғындағы биләмәләрҙә үҫтереү мәсьәләһен ҡала хакимиәтендә тиҫтәләгән йылдар элек үк ҡаранылар. Әммә финанс мөмкинлеге булманы. Федераль үҙәктең ярҙамы беҙгә алға барырға ярҙам итә, – тине Радий Фәрит улы.

Журналистар менән әңгәмәлә Башҡортостан Башлығы төбәктең Төҙөлөш һәм торлаҡ-коммуналь хужалыҡ министрлығына һәм Өфө хакимиәтенә ғаризаларҙы сифатлы әҙерләгәне өсөн рәхмәт белдерҙе һәм проекттың ҡала халҡының йәшәү кимәлен күтәреү өсөн әһәмиәтен һыҙыҡ өҫтөнә алды.

– Өфө аръяғы һәм Ағиҙел аръяғы үҫешенә коммуналь инфраструктураның булмауы ҡамасауланы – уның төҙөлөшөн үҙ көсөбөҙ менән тәьмин итә алмаҫ инек. Бында бик күп эштәр талап ителә, – тип йомғаҡ яһаны Радий Хәбиров. – Беҙ етди ғариза биреү кампанияһын үткәрҙек һәм 13,5 миллиард һум федераль ярҙам алдыҡ. Селтәрҙәр мәсьәләһен хәл итеү арҡаһында бында тағы ла алты миллион квадрат метр торлаҡ – тотош юлдаш ҡала төҙөй аласаҡбыҙ. Шулай уҡ Өфө аръяғында урынлашҡан һәр ауылды һыу менән тәьмин итәсәкбеҙ – был бигерәк тә унда йәшәүселәр өсөн мөһим. Нуғай, Зинин, Шмидт төрлө кимәлдә һыу етешмәүсәнлеген кисерә. Был мәсьәләне лә беҙ ябасаҡбыҙ.

Фото: Башҡортостан Башлығы сайты.