Бындай билдә булһа - тимәк сифатлы

“Башҡортостан продукты” сифат билдәһе менән тауарҙар илдең бөтә төбәктәрендә һатыла, ә проектта ҡатнашыусы 34 компания сит илгә экспорт поставкаларын уңышлы үҫтерә. Был хаҡта Хөкүмәт кәңәшмәһендә республиканың сауҙа һәм хеҙмәттәр министры Константин Климин хәбәр итте.

“Башҡортостан продукты” проекты төбәктең 907 предприятиеһын берләштерә. 2025 йылда 104 етештереүсе дипломант статусына лайыҡ була, ә тейешле логотипты тағы ла 4,5 мең тауар төргәгенә урынлаштырырға мөмкин.

– Башҡортостан продукцияһы ҙур һорау менән файҙалана. “Башҡортостан продукты” бренды республикала һәм унан ситтә танылған сифат билдәһенә әүерелә, – тине Константин Климин.

Шуны билдәләп үтергә кәрәк, республика брендтарын үҫтереүҙә һәм илдең ҙур сауҙа майҙансыҡтарында Башҡортостан продукцияһының булыуын киңәйтеүҙә предприятиеларға ярҙам итеү Сауҙа һәм хеҙмәттәр министрлығы эшенең мөһим йүнәлеше булып тора.

Проект дипломанттарының ҡаҙаныштары айырым иғтибарға лайыҡ. Мәҫәлән, ғаилә умарталығы етәксеһе Григорий Куляшов Һаҡлыҡ банкының “Яратҡан бәләкәй бизнес” премияһы еңеүсеһе була һәм “Маркетплейстарҙа сауҙа итеү” категорияһында илдең топ-100 эшҡыуары иҫәбенә инә. Ит снектары етештереүсе Илвира Куртмамедова иң ҙур онлайн-платформаларҙың береһендә һатыу лидеры булды. Ә Раевканың “Альшей-Мясо” ит комбинаты Екатеринбургта XXV ит һәм балыҡ продукцияһы сифаты фестивалендә I дәрәжә диплом яулай.

Башҡортостан Башлығы министрлыҡҡа төбәк етештереүселәренә ярҙам иткәне һәм Рәсәй баҙарында республика тауарҙарын алға этәргәне өсөн рәхмәт белдерҙе.

Белешмә:

Төргәктә “Башҡортостан продукты” билдәһенең булыуы тауарҙың республикала етештерелгән сеймалдан эшләнгәнен, ә продукцияның сифат һәм хәүефһеҙлек талаптарына тап килеүен күрһәтә. Маркировкалау хоҡуғын алыу өсөн проектҡа инеү өсөн ғариза бирергә кәрәк. Унда төбәк етештереүселәренең ҡатнашыуы бушлай.

Фото: Башҡортостан Башлығы сайты.