“Яуаплылыҡты кешеләргә һалмайыҡ”

Бөгөн Хөкүмәттең аҙналыҡ кәңәшмәһе һуңғы көндәрҙә көн үҙәгендә булған мәсьәлә – яғыулыҡ баҙарындағы хәлде тикшереү менән башланды. Башҡортостан Башлығы Радий Хәбиров белдереүенсә, төбәк властары АЗС-тарға яғыулыҡ поставкаһын арттырған һәм бөтә профилле предприятиелар көсәйтелгән режимда эшләй.

– Макроиҡтисади сәбәптәр ҙә, субъектив сәбәптәр ҙә бар. Ләкин беҙҙең АЗС-тарҙа ныҡлы дефицит бар икәне тойолмай. Логистикаға ла һорауҙар тыуа, беҙҙә автозаправкалау станциялары структураһы бик төрлө. 200-ҙән ашыу “Башнефть” заправкалары эшләй, шәхси АЗС-тар ҙа бар. Шул уҡ ваҡытта “Башнефть” булмаған райондар бар, һәм бында кешеләр шәхси станцияларға ҡарап ҡала. Ә  уларҙың бәләкәй булыуы һәм яғыулыҡ һатып алыу мөмкин булмауы арҡаһында, тотош райондар бензинһыҙ ҡала. Быға юл ҡуйырға ярамай. Бындай минуттарҙа Хөкүмәт тулы энергия менән эшләргә тейеш, – тине Радий Хәбиров. – Кемдер кешеләрҙе тәнҡитләргә тырыша, йәнәһе улар канистрҙарға һатып ала, һәм яуаплылыҡты уларға һала – был дөрөҫ түгел. Бурысыбыҙ – нормаль логистика ойоштороу. Канистрҙар менән проблема бар, әммә ул билдәләүсе характерҙа түгел. Был ҡарар ҡабул ителде, һәм мин уны үтәүҙе һорайым — беҙ һауыттарға яғыулыҡ ебәреүҙе тыйҙыҡ. Беҙгә шау-шыуҙы бөтөрөргә кәрәк, ул да бик ныҡ ҡамасаулай. Нефть эшкәртеү заводтарынан яғыулыҡ ебәреүҙе арттырҙыҡ, шуға күрә шау-шыу тулҡындың кәмеүенә ышанабыҙ. Бөгөн иртән ажиотаждың бер аҙ кәмеүен күрәбеҙ, ләкин тынысланырға иртә. Эште аҙағына еткереү мөһим.

Башҡортостан Башлығы ҡала һәм райондары етәкселәренә канистрҙа бензин ебәреүҙе тыйыу тураһындағы йөкләмәнең һәм АЗС-тарҙа индерелгән нормаларҙың үтәлешен шәхсән күҙәтергә ҡушты.

– Әле Хөкүмәт һәм район башлыҡтары алдында торған төп бурыс — баҙарҙы туйындырыу һәм тәү сиратта физик шәхестәр өсөн яғыулыҡ буйынса шау-шыуҙы кәметеү. Ажиотаж бөтһә генә хәл нормаға киләсәк, – тине ул.

Контраль идаралығына шәхси заправкалау станцияларындағы хаҡтарҙы тикшерергә ҡушылды. Шулай уҡ төбәк етәксеһе нефть предприятиелары һәм заводтары хәүефһеҙлеге мәсьәләһен мөһим тип атаны.

– Беҙ “Башнефть” компанияһы менән террористик һөжүмдәрҙән һаҡланабыҙ. Үткән аҙнала, мәҫәлән, етди һөжүм булды — 12 пилотһыҙ аппаратты бәреп төшөрҙөк. Беҙ“ Барс" отрядын ойошторҙоҡ, уны ҡоралландырҙыҡ, улар беренсе алышты ҡабул итте. Һәм кешеләр ҙә яғыулыҡ менән бәйле хәлдең ауыр хәл, хәрби хәл фонында барлыҡҡа килеүен аңларға тейеш, – тине Радий Фәрит улы.

Фото: Башҡортостан Башлығы сайты.