"Урал аръяғы" һабантуйы яңы кимәлгә сыға

13 - 15 августа Сибай ҡалаһында "Урал аръяғы" VIII Бөтә Рәсәй инвестиция һабантуйы үтә. Унда федераль һәм төбәк власть органдары вәкилдәре, эшҡыуарҙар, инвесторҙар, эксперттар, шулай уҡ Берләшкән Милләттәр Ойошмаһынан, сит илдәрҙән делегациялар ҡатнашасаҡ.

‎"Еңеү иҡтисады" пленар ултырышы ‎эшлекле программаның төп ваҡиғаһы буласаҡ. Унда республика Башлығы Радий Хәбиров һәм Стратегик башланғыстар агентлығы генераль директоры Светлана Чупшева ҡатнашасаҡ.

‎Форумдың планында - ауыл-ҡалаларҙы үҫтереү һәм инвестиция режимы буйынса тематик сессиялар, шулай уҡ МХО ветерандары өсөн "ӨЙҘӘ бизнес" республика эшҡыуарҙар программаһына старт биреү, "Йәшмә йөрәге" халыҡ-художество кәсептәре фестивале.

‎- "Урал аръяғы" инвестиция һабантуйы Башҡортостан иҡтисадын яңы кимәлгә сығара. Беҙ Төркиәнең, Фарсы ҡултығының, Көньяҡ-Көнсығыш Азияның эшлекле аудиторияһы тарафынан ҡыҙыҡһыныу күрәбеҙ - был миллиардлаған һум менән баһаланған күп килешеүҙәргә нигеҙ. Һабантуйҙа булдырыласаҡ хеҙмәттәшлек иҡтисад тармағында ҡына түгел, мәҙәниәт өлкәһендә лә ике ара күпер буласаҡ, халыҡ-ара даирәлә республиканың ышаныслы партнер булараҡ имиджын күтәрәсәк, - тип билдәләне тышҡы иҡтисади бәйләнештәр һәм конгресс эшмәкәрлеге министры Маргарита Болычева.

‎Форумда республиканың сәнғәт әһелдәре, саҡырылған коллективтар сығыш яһаясаҡ. Шулай уҡ ҡунаҡтар өсөн ижади индустриялар аллеяһы ойоштороласаҡ. ‎Сараның ойоштороусылары - Стратегик башланғыстар агентлығы һәм Башҡортостан Республикаһы Хөкүмәте.

Сығанаҡ: https://resbash.ru/news/localnews/2026-07-21/v-bashkirii-proydyot-vserossiyskiy-investitsionnyy-sabantuy-zauralie-2026-4758003