Стәрлебаш районы үҙәгенең “Ислам нуры” мәсетенән хәбәр итеүҙәренсә, күптән түгел егермегә яҡын шәкерткә ошондағы 7-се мәхәлләлә белем алыу тураһында белешмә тапшырылған.
Был курс ике йыллыҡ. Изге эште 2006 йылда хажи Ғәлиәкбәр Искәндәров ойошторған. Ошо ваҡыт арауығында 150 кеше Ислам нигеҙҙәре буйынса тәүге һабаҡ алған. Курстарҙа шәкерттәргә аҡида, тәджүид, тәфсир, фиҡһ фәндәре, ғәрәп теле, пәйғәмбәрҙәр тарихы, хәҙистәр өйрәтелә.
Был юлы белем алырға теләгәндәр айырыуса күп булғанлыҡтан, улар ике төркөмгә бүлеп уҡытылған. Тәүгеһендә – хаҡлы ялдағылар, икенсеһендә – урта быуын вәкилдәре. Хеҙмәт йәшендәгеләр өсөн уҡыу киске сәғәттәрҙә ойошторолған.
Документ тапшырған көндә һәр шәкерт, алған белемен күрһәтеп, сүрәләрҙән аяттар уҡып ишеттергән. Уларҙы мәсеттең имам-хатибы Тәлғәт Ғәзизуллин ихлас ҡотлап, ошо йүнәлештә белем алыуҙан туҡтамауҙарын, динебеҙҙе үҫтереүгә өлөш индереүҙәрен теләгән.
Шәкерттәр курсты ойоштороусыларға, остаздарына ихлас рәхмәт һүҙҙәрен еткереп, борон-борондан дини мәғрифәтселек үҙәге булған Стәрлебашта ата-бабалар юлын бергәләп дауам итеү мөһимлеген белдергән.