Мәсетле ерҙән нур китмәҫ

Мәҫәлән, күптән түгел Стәрле­та­маҡ районының Наумовка ауылында тағы бер иман йорто асылды. Изге эште ағалы-ҡустылы Рөстәм менән Радик Фәхретдиновтар башлаған һәм барлыҡ сығымдарҙы ҡаплаған. Мәсет уларҙың әсәләре исемен йөрөтә: “Бибинур”.

Ғибәҙәтхананы асыу тан­тана­һында Башҡорт­ос­тан мосолманда­рының Диниә назараты рәйесе мөф­төй Айнур хәҙрәт Бир­ғәлин, Стәр­летамаҡ районы хакимиәте вәкил­дәре, Наумовка ауыл биләмәһе башлығы Денис Чиликин һәм башҡалар ҡатнашты. Тантаналы саранан һуң сабыйға исем ҡушыу йолаһы ла үткәрелде.

“Ауылдаштарыбыҙ ғибә­ҙәт­хана юлына саң ҡундыр­маҫ, йәмәғәт на­маҙ­ҙарына күпләп килерҙәр, дини бай­рамдар күмәк халыҡты бер­гә туплар тигән ышаныс­та­быҙ. “Бибинур” төйәге­беҙ­ҙе тағы ла нурландырыр, кү­ңелдәрҙә иманды нығытыр”, – тине сы­ғы­шында ағалы-ҡустылы Фәхрет­диновтар.

Күптән түгел Ҡалтасы районы үҙә­гендә иһә “Иман нуры” мәсетенең егер­ме йыллығы билдәләнде һәм ошо уҡ көндә ғибәҙәтхана ҡарама­ғын­да уҡыу үҙәге асылды. Сарала Юғары мөфтөй, Рәсәй мосолман­да­ры­ның Үҙәк диниә назараты рәйесе Тәлғәт хәҙрәт Тажетдинов та ҡатнашты.

“Мәсеттәребеҙ ҡара­ма­ғында уҡыу үҙәктәре булдырыу дини йәһәттән үҫеш­тең артабанғы баҫҡысына күтәрелә барыуыбыҙ, йәш быуынды хәстәрләү тура­һында һөйләй. Бер изге ғәмәл дә туҡтап ҡалмаҫҡа, артабан камиллашырға, нығынырға тейеш. Уҡыу үҙәктәрендә эш традицион дин нигеҙендә тейешле кимәлдә алып барылыр, тарҡалыуға, фекер айыр­малыҡтарына юл ҡуйылмаҫ тигән ышаныстабыҙ”, – тине Юғары мөфтөй.

Төбәгебеҙҙә дини үҫеш­кә йүнәл­телгән һәр ғәмәл үҙ емештәрен бирер, иншал­лаһ. “Аллаһ юлында ярҙам күрһәтеү, изгелек ҡы­лыу, гүйә ки, орлоҡ кеүек. Ул үҫеп етеп, ете башаҡҡа әйләнер. Һәр береһендә йөҙ орлоҡ булыр...” – тиелә “Әл-Бәҡара” сүрәһендә. Ихлас күңелдән башҡарылған изге ғәмәлгә Раббыбыҙ сауабын арттырып бирә. Шул уҡ ваҡытта мәсет төҙөү ме­нән генә эш бөтмәй әле. Унда дини ғәмәлдәр тейе­шенсә алып барылһын өсөн берҙәм булыу, бер-беребеҙгә ярҙам итеп, кәңәшләшеп, фекер алышып эш итеү зарур.

“Бөтөн эш ниәткә бәйле”, – тигән пәйғәмбәребеҙ Мө­хәммәт ғәләйһис-сәләм үҙе­нең мөбәрәк хәҙисендә: изге юлдағы изге теләк­тәребеҙ тормошҡа ашһын, иншаллаһ.

Стәрлетамаҡ, Ҡалтасы райондары.