“Шиғырҙа сихри көс бар”

Мәғлүм булыуынса, 12 февралдә халҡыбыҙҙың арҙаҡлы шағиры Рәми Ғариповтың тыуыуына 90 йыл тулыу билдәләнә. Ошо уңайҙан әҙәбиәттең, һүҙҙең тормошобоҙҙағы ҡиммәте хаҡында йәнә әйтеп үтәйек.

Борондан һүҙ оҫталары араһында бәйгеләр ойошторолоуы, иң тапҡыр телле­ләр­ҙең халыҡ араһында абруй ҡа­ҙаныуы хаҡында халҡы­быҙҙың ауыҙ-тел ижады аша ла танышбыҙ. Сәсәндәр ысын­барлыҡта йәмғиәттә ҙур урын биләгән, уларҙың һүҙе иң кәрәк ваҡытта әйтелеп, кешелек тарихындағы мөһим ваҡиғаларҙың нигеҙе булып торған.

Әҙәбиәтебеҙҙең иң юғары нөктәһе – “Ҡөрьән Кәрим”. Изге китапта, шулай уҡ пәй­ғәм­бәребеҙ Мөхәммәт ғәләй­һис-сәләмдең хәҙистәренә икһеҙ-сикһеҙ аҡыл, асылып бөтмәгән хикмәт һалынған. Уларҙың бөйөк тәрбиәһе киләсәк әллә күпме быуын вәкиленә тура юл күрһәтәсәк, яңы асыштарға юлыҡтырасаҡ, иншаллаһ.

Һүҙ – телдең, әҙәбиәттең, мәҙәниәттең, сәнғәттең ни­геҙе. Ул – һәр заманда ла иң ҡеүәтле ҡорал: кәрәк сағында әҙәм балаһының осор ҡанат­тарын һындырыр, шул уҡ ва­ҡытта ергә бөгөлөп төшкәнгә ҡалҡынырға ҡул һуҙыр көскә эйә. Һүҙҙәр донъяһы булған әҙәбиәтебеҙ иһә – кешелеккә йәшәүгә ынтылыш биргән, уға һулар һауалай хеҙмәт иткән, яҡшылыҡҡа, яҡтылыҡҡа әйҙә­гән рухи маяҡ. Быуаттар дауамында тупланған ошо тиң­һеҙ хазинаны күҙ ҡараһылай һаҡларға, уның киләсәген тәьмин итер яҙыусы­лары­быҙҙың, шағирҙарыбыҙҙың ҡәҙерен белергә тейешбеҙ.

Пәйғәмбәребеҙ Мөхәммәт ғәләйһис-сәләмдең бер мөбәрәк хәҙисендәге “Шиғырҙа сихри көс бар” тигән һүҙҙәре күп нәмә хаҡында һөйләй. Ошо аманатты онотмайынса, һәммәбеҙгә лә рухи мираҫыбыҙҙы һаҡларға, үҫтерергә насип ҡылһын, ҡәләм оҫталарын тел ҡөҙрәтенән айырмаһын.

Дилбәр ИШМОРАТОВА